بەسام سەقەری، نوونەرێ جڤاتا سوریا دیموكرات ل واشنتون ڕاگەهاند، ئەمریكا هێز و لایەنێن كوردی ل ڕۆژئاڤایێ كوردستانێ ئاگەهدار كرینە كو دێ هێزێن خۆ یێن سەربازی ژ سوریێ ڤەكێشیت، بەلێ پڕۆسا ڤەكێشانێ هەڤشێوێ ئەفغانستان نابیت، بەلكو پێنگاڤ پێنگاڤ دێ هێنە ڤەكێشان.
نوونەرێ (مەسەدە) ل واشنتون گوت: هەتا بدووماهی هاتنا شەڕێ دژی داعش هێزێن ئەمریكا دێ میننە ل ڕۆژئاڤایێ كوردستانێ و سوریێ، بەلێ دیار نینە كا بووماهی هاتنا شەڕی دێ كەنگی بیت، و ناڤبری خۆیاكر، كو ڕێڤەبەرییا خوسەرا ڕۆژئاڤایێ كوردستانێ داخواز ژئەمریكا كرییە، بەری ڤەكێشانا هێزێن خۆ، چارەسەریەكا سیاسی بۆ كێشە و قەیرانێن سوریێ پەیدا بكەت.