لەبارەی مێشكی هەنگ ئەمانە بزانن
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

لەبارەی مێشكی هەنگ ئەمانە بزانن

 

 

بۆچی مێشكی هەنگ بەهادارترین بڕە بارستەی نێو سروشتە..؟ بۆچی لە مێشكی مرۆڤیش سەرسوڕهێنەرترە ..؟

قەبارەی مێشكی هەر هەنگێك هێندە بچووكە ئەوەندەی نوكی پێنوسێكە، تەنیا لە نزیكەی یەك ملیۆن خانە دەماریش پێكدێت، بەڵام تواناكانی ئەم مێشكە بچووكە بە بەراورد بەو قەبارە بچووكەی كە هەیەتی بەتەواوی بێ وێنەیە لەنێو هەموو سروشت و ژینگەی سەر هەسارەكەمان ..! ئەم مێشكە بچووكەی هەنگ پێمان دەڵێت، كە تەنیا قەبارەی مێشكی زیندەوەران سەنگی مەحەك نیە لە دیاریكردنی تواناكانی مێشكی ئەو زیندەوەرانە، بەڵكو ئەوەی یەكلاكەرەوەیە ئەو كارانەیە كە ئەو مێشكە ئەنجامی دەدات بە بەراورد بە قەبارەكەی، ئێمە دەزانین كە مرۆڤ خاوەنی مێشكێكی بێ وێنەیە لە زیرەكی و بە توانایی، بەڵام مێشكی مرۆڤ بە بەراورد بەمێشكی هەموو گیانەوەرو زیندەوەرانی تر زۆر زەبەلاحە، لە نزیكەی (86) ملیار خانە دەماریش پێك هاتووە، بۆ نمونە قەبارەی مێشكی مرۆڤێك نیو ملیۆن جار گەورەترە لە قەبارەی مێشكی هەنگێك ...

بەڵام وەرن با بزانین توانا سەرسوڕهێنەرەكانی مێشكی هەنگێك بەو قەبارە بچووكەی چیەو چەندەو چۆنە ..؟

هەنگەكان بەكۆمەڵ دەژین، هەر كۆمەڵەی لەنێو شانەیەكی تایبەتیدا دەژین بۆیە دەبێت ڕۆژانە دوای دەرچوونیان و دوركەوتنەوەیان بۆ چەندەها كیلۆمەترو دوای پەیداكردنی هەڵاڵەی گوڵەكان هەریەكەیان بگەڕێتەوە نێو هەمان ئەو شانەیەی خۆی، هەنگەكان سەرسوڕهێنەرانە زۆر بەئاسانی دەتوانن ئەمە بكەن، چونكە توانای ناسینەوەی ئاڕاستەكان و هەموو ڕێڕەوەكان و شوێنەكانیان هەیە، ئەمە یەكێك لە هەرە گرنگترین تواناكانی مێشكی هەنگە بەو بچووكیە ..!

هەروەها لەگەڵ ئەوەی هەنگەكان لەكاتی فڕینیان بەردەوام كۆمەڵێك بژاردەیان دێتە پێش، بەڵام هەریەكەیان دەتوانێت یەكسەر بڕیار لە بژاردە دروستەكە بدات ئەگەر یەكەمجاریشی بێت بەبێ ئەوەی فێركرابێت لەلایەن هەنگەكانی ترەوە، ئەمە ئاماژەیەكی زۆر بەهێزە بەوەی كە هەنگەكان وەكو مرۆڤ بەئاگان ..!

توانایەكی تری زۆر گرنگی هەنگ ئەوەیە كە هەر یەكێكیان لە ڕێگەی چاوەكانی دەتوانێت درەختەكان و گوڵەكان ببینێت و بیانناسێتەوە، بەردەوام پێشەوەو تەنیشتەكانی خۆی دەبینێت، ئەمەش نەوەكو تەنیا لەڕێگەی بینینی تیشكی بینراو بەڵكو توانای هەستكردن و بینینی تیشكی خوار سورو تیشكی سەروی وەنەوشەییشی هەیە، هەر بۆ بەراوردیش مرۆڤ توانای بینینی تیشكی خوار سورو سەرو وەنەوشەیی نیە ..!

هەنگ بەهۆی ئەو دوو ئەنتێنانەی كە بەسەریەوەیە هەستی بۆنكردنی هەیەو دەتوانێت لەو ڕێگەیەوە خۆی لە گازو ئاوێتە كیمیاییە زیانبەخشەكان دوربخاتەوەو بەرەو ئەو درەخت و گوڵانە بڕوات كە دەزانێت خۆراكی پێویستی لێ دەست دەكەوێت ...

كەواتە كە ئەمجارە هەنگێكت بینی ئەوەت بیرنەچێت كە ئەو زیندەوەرە بچووكە هەڵگری مێشكێكی زۆر زۆر بچووكە بە قەبارە، بەڵام ئەو مێشكە بچووكە بە تواناترو بەهادارترە لە هەر بڕە بارستەیەكی تری وەك خۆی بە قەبارە لە نێو ئەم سروشت و گەردوونە كە تا ئێستا ئێمە دەیزانین..!

 

(لوقمان حەوێز)

هه‌واڵی گرنگ