قنارەکرن ب ئاميرێت ئوکسجینێ
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

قنارەکرن ب ئاميرێت ئوکسجینێ

مەزنە مەرگەساتا جەرگبڕا مرنێ ل دهۆکا بێ خودان و بێ سەمیان نهێنیا وێ باش دیاربوو ب ڕاپۆرتا لژنەکا دویڤچۆنێ یا جڤاتا پارێزگەها دهۆکێ ئەوا ل 29-11-2021 ب ئامادەبۆنا داخوازکارێ گشتى و دەزگەهێن ڕاگەهاندێ هاتیە پێشکێش کرن، باش خۆیابوو سەرلێدانا بەردەوام ل دەستپێکا بەڵاڤبوونا کوڕونایێ پەیدابوویە و تا نها ژى نەڕاوەستایە، لێ نە تاوانباربوون دهاتنە ژناڤبرن، بەلکى هندەک مرۆڤێن بێ گوننەهێن دەراڤتەنگ یێن پێدڤى هەڤسۆزى و پشتەڤانیێ دبنە قوربان، بەلێ ئەوبوون یێن کوڕونایێ شیایە سیستەمێ پاراستنا جەستەیێ وى و فایرۆسێ ترسناک گەهشتیە مێلاکا سۆر (پشێ)، هندەک ژوان پێدڤى ئوکسجینێ بووینە، یێن زۆر تەنگاڤ ژى ئەو بوون یێن گەهشتینە ئاستێ پێدڤیا ئێخستنا وان ل ژێر ئامیرێ هەناسەدانا دەستکرد (CPAP)، لێ ل شوینا ئەڤ ئامیرە ببنە هاریکار ژ بۆ چارەرەسەریێ، بەرۆڤاژى بوونە هاریکار ژبۆ مرنەکا ب ئەشکەنجە و ئازاردانەکا چیا خۆ ل بەر نەگرن، واتە: کورت و کرمانج: مرن ب بوتلێن ئوکسجین و ئاميرێت ھەناسەدانا دەستکرد بجهدهات.

هەوار چ کارەساتە!، ژسەرێ من بخو دوو کورتە چیرۆکێن تراژیدى و دلشەوتین نا درەکەڤن: ئێک ژ وان یا ھەڤالەکێ ھێژا ڕۆژنامەڤانەکێ ژێھاتیە بەریا دوو هەیڤان ب چاڤێن روندک تێدا ھشکبووین و گرى د گەوریێرا ڕاوەستاى کارەساتا ژدەستدانا سێ کەسا دماوێ تەنها سێزدە ڕۆژاندا ژ خێزانا خو ل ژێر ئامیرێ ھەناسەدانێ ژ دەستداین بۆ من ڤەدگوهاست، دۆپات دکر مرنا وان عەزیزان نە سرۆشتى بوو، لێ من ل بەر دلێ ویدا و دگۆتێ: وەسواس و دۆدلیێ بۆ خۆ چێنەکە، دیاربوو ئەز خەلەتم و داخوازا لێبوورینێ دکم، و جیرۆکا مەئساویا دویێ یا کوڕی مەزنە سەرکردێ پێشینێ پۆلیسێن دهۆکێ بوو، دلکوزرینا وەغەرا چار کەسان ژ خێزانا خۆ بو خەلکێ ھەمیێ ل سەر دەزگەھەکێن میدیایێ بەریا چەند ڕۆژەکا ڕاگەھاند، خویاکر: پشتى دیتنا ڕاپۆرتا لژنا ئەنجۆمەنێ پارێزگەها دهۆکێ ھەر وەکی ژ نوی کارەساتا گیان ژدەستدانا چار کەسان ژ خێزانا من: (باب، دەیک، برا، مەت) ب سەرمەدا ھاتی، کو ھەمی ژی ل ژێر ئامیرێن ژکارکەفتی و ژ ئەگەرێ بوتلێن ئوکسجینێ یێن پری ژەنگار بوونە قوربانێت بێ بهادانا مرۆڤى ل کوردستانێ.

پشتى ڕاپۆرتا لژنا ناڤبرى ھاتیە پێشکێشکرن بو ھاوڵاتیێن دھۆکێ باش دیاربوو چەوان یاری و تڕانەکرن ب ڕوح و خوینا ڤی مللەتی دهێنە کرن، چەوان بێ خەمى گەھشتیە بنێ بنێ نھالا گەنیا بەدڕەوشتیێ، هەمى شۆلەژێ و بەرپرس و ھەتا بگەھیە وان نۆژدارێن تایبەتمەندێن خڕا دین و ئیمان داینە لایەکێ، فێجا بلا نەساخێن بەلەنگاز ئەزمان ددەڤێ واندا ڕەق ببت - ھەر وەکی وی بەرێزێ کەزەب شەوتی یێ چار کەس ژ دەستداین وەسفێ جەنازێ دەیکا خو دکر، خو تو دێ بێژی ئەڤ خاتوینا ڕەحمەتى ل زیندانا ئەبو غرێب ل سەر دەمێ سەددامێ فاشیست یا ھاتیە سێدارەدان. ئەرێ دەمێ لژنا دویڤچۆنێ یا بەحسێ وێ بووری د ڕاپۆرتا خودا تەکەس دکت: "ده‌مێ مه‌ سه‌ره‌دانا نه‌خوشخانێن پارێزگه‌ها دهوكى كرى، بو مه‌ دیاربوو كو ( 80 %) ژ بوتڵیت نه‌خوشخانێن مه‌ دگه‌ڤنن و نابیت بهێنه‌ بكار ئینان" یانژی دەمێ ڕاپۆرت ب ئاشکەرایی دبێژتە ھەمی خودان گوھ وچاڤان: " مه‌ وه‌ك لژنه‌ چه‌ند بوتله‌ك ڤه‌كرن، دیار بوو كو رێژه‌كا زۆر یا ژه‌نگارێ دناڤدا هاته‌ دیتن، و ئه‌ڤ چه‌نده‌ هه‌مى ب وێنه‌ و ڤیدیو ل ده‌ڤ مه‌ تومار كرینه..‌ " وەکى دیار و دیسان نۆژدارێن تایبەتمەند ژبۆ لژنێ دۆپات کرینە: "ئه‌ڤ ژه‌نگاره‌ دگه‌هیته‌ ناڤ سیهێن نه‌ خۆشى... و حه‌ساسیێ (هەستياريێ) دروست دكه‌ت، كول دكه‌ت، نه‌خاسمه‌ نه‌خوشێ كوڤید 19، سیهێت وى بخوه‌ ئارێشه‌ هه‌نه‌"، لێ خۆدێ حەقێ قوربانیا و کەس و کارێن وان بستینت ھەر ئەڤ ژەھرە ژنگارە دچیتە ناڤ سینگ و پشێت نەخوشاندا، و ھەر بوتلێن ئکسپایەر ئەڤە زێدەتر ژ (600) رۆژان دهێنە ب کارئینان، باشە ئەگەر ئەڤە حالێ خەلکێ دهۆکێ بت ل گەل مرنێ ئەرێ گەلۆ: ما مرۆڤکوژێن روحا ئینسانان ل دەڤ وان بفلسەکێ نەچیت شاخ پێڤە ھەنە؟!

ئەڤ لەیزتن و بێ بهاییا ب گیانێ خەلکێ یا ل وەڵاتێ مە و باژێرێن مە هەى ئەگەر ل هەر جهەکێ دیترێ جیهانێ با– بێى هیچ گومانەک – دا بیتە ئەگەر بۆ کەفتنا حوکومەتێ و پێشکێشکرنا مەزنترین بەرپرسێن ساخلەمیێ ژ وەزیرى بگرە و هەتا بگەهیە ڕێڤەبەرێ نەخوشخانێت مرنێ بەڵاڤە دکن ل سەر نەخۆشێت کورونایێ ژبۆ دادگەهکرنێ، دا گەهشتبان سزایێ خۆیێ ژهەژى تاوانێت وان، گونەھێن ڤان زۆر مەزنترن ژ وێ یا ل وەڵاتێ ئوردنێ ڕویداى دەمێ ل نەخۆشخانەیا (سەلەت) ل 13-3-2021 کو ئێک دەمژمێرێ ئوکسجین ژ نەخۆشێت کوڕونایێ چکبووى و نێزیکى دەهـ کەسان گیانێ خۆ ژ دەستداین، دونیا ل وێرێ سەرێک و بنێک بوو، شاهێ ئوردنێ (عبد الله حەسەن) ئێکسەر هاتە سەرەدانا خەستا ناڤبرى و ڕێڤەبەرێ وێ ژکارێ وى دویر کر، پاشان وەزیرێ ساخلەمیێ دەست ژکارکێشا، چوویە بەر دادگەهـێ. هەر چەندە ئوردون وەڵاتەکێ رۆژهەلاتا ناڤینا پاشکەفتیە ژى، لێ هەر گیانێ مرۆڤان بچەک ڕێزا خۆ ل وێرێ هەیە، ئەڤجا ئەگەر ل کوردستانێ هندى دندەکێ رۆحا مرۆڤان بهایێ خۆ هەبت ئەڤ تاوانێت فەتساندنا نەخۆشێت کورونایێ ب سەر دفنا وانڤە ناچیت یێت بووینە ئەگەرێ ئیعداما ب ئوکسجینێ و نەشارەزاییا کارئینانا ئاميرێت (CPAP)ێ، هیڤیا من ئەوە بچەک وژدانا مە کاربکت.

هه‌واڵی گرنگ