وە دیارە قەدەرا مە ڤى مللەتى ئەوا مە ب دەستێن خوە نەخشە بۆ کێشاى ئەوە، چ جاران ئەم و کارەسات ژ هەڤ نە ڤەقەتین، خەلکێ جیهانێ یێ ب گەشبینى و خەونێت ژیانەکا خوەشتر پشێوازیێ ل ساڵا نوى دکن، لێ ئەم ب کۆمەکا مەرگەساتێن جەرگبڕ؛ ل هەولێرێ ب چیرۆکا وێ گەندەڵیا ڤەگۆهاستنا ئاڤڕێژان بەرەڤ تاخێن چینا کەفتى هەتا چەند ملیمەکێن ئاڤا بارانێ ل مە دبیتە لەهى و مالوێران و مرن و نەمان، ل ئاکرێ ژى ل کێەلەکا بیرێن پەترۆلێ، ل سەردەمێ چەرخێ بیست و ئێکێ ژن و زاڕۆکان خوە ب ئاگرێ ڕەژیێ د پاراستن، لێ هێشتا باش گەرم نە بووین هەناسە لێ چک دبن و ب غازا ژەهراوى خەندقین، ئەڤە نە بەس بوو دەریا ئیجە ژى نامەکا ڕەش تارى ڤڕێکر، مرنەکا ب کۆمى ژ مەڕا شاند، دوو خێزان (نەهـ کوردان) جانێن خوە ژ دەستدان، هەمى بوونە تراژیدیێن نوى و کەفتنە سەر یێن کەڤن؛ بەلکى هەستا ب بەرپرسیێ بچەک ڕێکا خوە ژبۆ دلکەڤران ببینت!

بەلێ تۆڤێ بەلکى چ جاران شین نە بوویە و نابتن ژى، هەوار چ بکین ئەم یێن ل وێ هەستێ دگەڕین ئەوا ژ مێژوەرا بارکرى، بڕاستى ئەم یێن ل دۆر تشتەکێ مرى د پەیڤن!

چەوان هەست ب دل و ژدان و غیرەتڤە نە مرینە، ئەگەر نها وەڵاتیێن ڤى وارى نەخاسمە هەژار حالێ خوە ل گەل تەیر و تەوال و پەزێ دەولەتەکێ لێ هەستا ب بەرپرسیێ د ناخێ مەزنێت واندى زیندى بەرامبەر ب کن، دێ بینن ئەوان بۆنەوەران بهایەکێ مەزن هەیە هێشتا مرۆڤێ کورد نە گەهشتیە وێ ڕێزێ، بەرێ خوە ب دەنێ ئەڤە ئێک ژ حوکمڕانێن دادپەروەرە د مێژوویێدا ئەوێ دگۆتنێ عومەرێ کوڕێ خەتتابى (خ) دبێژت: "...لَوْ هَلَكَ حَمَلٌ مِنْ وَلَدِ الضَّأْنِ عَلَى شَاطِئِ الْفُرَاتِ ضَائِعًا ؛ لَخَشِيتُ أَنْ يَسْأَلَنِي اللَّهُ عَنْهُ – ئەگەر بەرخەکێ پەزى ل بەر ئاڤا فوڕاتى هندا ببت؛ ئەز دترسم خۆدێ پرسیارى وى ژ من بکت"، ئەگەر هەستا ب بەرپرسیێ ژ گیانەوەرێت خیلافەتا وى ئەڤە بت، دێ نەیا سەیر بت ئەو هەستە هەمبەر مرۆڤان وە ل وى بکت سەر تا قەدەم مینا بها د ئاڤێدا ب هەژیت وەختێ دەنگێ گریێ ساڤایەکێ برسى خوە ل گوهێت وى داى، هەتا بڕیارا مۆچەیەکێ تایبەت بۆ هەمى زاڕۆکێن ب شیر نە دەرخستى هەدارا جانێ وى نە هات، ژ بۆ پشتڕاستکرنا خوەندەڤانێت هێژا ژ ڕاستیا چیرۆکا هەلویستێ بوورى یێ پێشەوا عومەرێ دێ وەرگێرانەکا وێ ژ پەرتۆکا (البدایە و النهایە) پێشکیشى وان کم:

"... شەڤەکێ عومەرى گوهـ ل گریێ زاڕۆکەکێ بوو، بەرەڤ وى دەنگیڤە چووو، گۆتە دەیکا وى: ژ خۆدێ ب ترسە و چاڤێ خوە بدە زاڕۆکێ خوە و ڤەگەڕا جهێ خوە، لێ دیسان دەنگێ گری هاتە گۆهێن وى، ڕابوو ئاخفتنا خوە دووبارە کر، و شەڤ بوورى گەهشتە نیڤا دەمێ خوە، جارەکا دن گریێ وى بچیکى هاتە ڤە، ڤێ جارێ عومەرى خوە نێزیکى دەیکێ کر، و ڕاستەڕاست گۆتێ: هەى ژى کورت، تو چەند دەیکەکا خرابى، ئەڤە چیە ژ دەستپێکا شەڤێ وەرە هەتا نها کورێ تە ڕەحەتى ب چاڤا نە کەفتیە؟!، ژنکێ نەمەردى نە کر و بەرسڤا وی دا: ئەز یا وى ژ خوارنێ مژویل دکم بەلێ ئەو ڕازى نابت، گۆتێ: ژبەر چى تو وە دکى؟! دەیکێ گۆت: چونکى عومەر چ دەرمالا ژبلى بۆ شیرڤەکریان نادت، عومەرى گۆتیێ: ما ژیێ زاڕۆیێ چەندە؟ بەرسڤا ویدا هندە هەیڤە، گۆتیێ مالئاڤا، لەزێ ل شیرڤەکرنا وى بەلەنگازى نە کە، و دەمێ بوویە نڤێژا سپێدێ خەلکێ نە دزانى ئەو چیە پێشەوا عومەر دخوینت ژبەر کەلا گریا ناخهەژینا د گەوریا ویدا فیغان دکر، هەر چ حالێ هەى دەمێ خلاس بووین، پێشەوا عومەرى گۆت: خوەلى ب من وەربت، چەند زاڕۆیێن موسلمانا من کۆشتینە، پاشان فەرمان ل بانگهەلدێرێ خوە کر، ئەڤجا گازى کر: قەت لەزێ ل شیرڤەکرنا عەیالێ خوە نەکن، ژبۆ هەر زاڕۆکەکێ د ئاخا وەڵاتیدا بهێتە دونیایێ، ئەم دێ دەرمالەکێ تایبەت فەرز و دابین کین، و ئەڤ فەرمانا ل کەناڕێن دەولەتێ هاتە بەڵاڤ کرن".

ئەگەر ئەڤە ل دەڤ هندەک کەسان تشتەکێ بووریێ مێژوویێ بت، ئایدیالیزم و میسالیەت بت، بلا بچەکێ چاڤێت ژ بەر بیێت خوە بلند بکن، بەرێ خوە ب دەنە هەستا بەرپرسیێ ل دەڤ چەندین حوکومەت و حوکمڕانێت جیهانا ئەڤرۆ، ئەو چەوان خوارنێ ل سەرێن چیا و ل چوول و بەیاران بەڵاڤ دکن، پاڵدەرێ وان هەستا ب بەرپرسیێ ژ گیانەوەرێت کیڤى و بالەفڕان، نە وەکو یێت مە ب مرنا زاڕۆکان، ب جەگەر شەوتینا دایکان، ب خەنقینا خەلکێ ب لەهی بارانان یان د دەریایێت ئینگلیز و یەونانان، ب هشکبوونا خوینا هەژاران د ناڤ سڕ و سەقەمێدا ، ب نەمانا سەرهەڤا (ب جوملە) قەت مییەکێ ل خوە شاش ناکن، ئەها ئەڤەیە د بێژنێ بەرپرسیا مودێل کوردى، ما شاء الله بۆ ڤێ بەرپرسیێ!