1. لاشەی مرۆڤ وا دروست كراوە كە پلەی گەرمی خۆی دەپارێزێت لە باڵانسێكدا لە نێوان (36.6) بۆ (37.7) پلەی سیلیزی، ئەگەر بێت و تووشی كەش و هەوایەكی جیاواز ببێت وەكو ئەم بەفرەی ئێستا، ئەوا لاشەمان خۆی رێك دەخاتەوەو دەگەڕێتەوە ئەو بەڵانسەی كە باسم كرد.
2. مێشكی مرۆڤ گەرمی پێوی تیایە كە پێی دەڵێن (سێرمۆستات) كە ئەو باڵانسە ڕا دەگرێت، كاتێك قاچ و دەست و دەم و چاوی مرۆڤەكە تووشی سەرما ببێت، ئەو ئیعاز دەنێرێت كە دەبێت خۆمان گەرم بكەینەوە.
3. باشترین رێگا بۆ خۆ گەرم كردنەوە دروست كردنی گەرمایە لە ناخی لەشماندا، تاكە ڕێگاش بۆ ئەمە جوڵاندنی بەهێزی ماسوولكەكانە، ئەم جووڵانەیە كە هەستی پێ دەكەین لە سەرماداو پێی دەڵێین (لەرز)، كەواتە ئەو لەرزو چۆقەی ددان و مووچڕكانەی بۆمان دێت مێشكی خۆمان پێمان دەكات هەتا ماسوولكەكان بجووڵێنێت بە پەلەو گەرمای پێ دروست دەكات!
4. ئەم لەرزە هەتا ماوەیەك بڕ دەكات هەتا مرۆڤەكە خۆی دەگەیەنێتە ژوورێكی گەرم یان خواردن و خواردنەوەیەكی گەرم یان جل و بەرگێكی گەرم و دوور دەكەوێتەوە لە ڕەشەباو سەرماو سۆڵەكە.
لێرەدا زۆر زۆر ووریای ئەم ڕاستییە بن: بە هەمان شێوەی لەرز لە كاتی سەرماو سۆڵەدا، لەرز دروستیش دەبێت كاتێك تووشی (تا) دەبین! تا چییە؟ تا نیشانەی نەخۆشییە، سرووشتی مرۆڤ نابێت تووشی (تا) ببێت، كۆرۆناو ئەنفلونزاو گرانەتاو ئەمانە تووشی (تا) مان دەكات نەك سەرما و سۆڵەو بەفر!!
جا بزانە، كاتێك تووشی (تا) دەبین، هەمان گەرمی پێوەكەی ناو مێشكمان دەست دەكات بە لەرز، بەڵام ئەم جارە بە شێوەیەكی غەشیمانە، گەرمی پێوەكە لەلایەن میكرۆبەكانەوە هاك دەكرێت و وای لێ دەكەن سەری لێ تێك بچێت و وا بزانێت بەفرو سەرما هەیە، بۆیە دەست دەكاتەوە بە جوڵەی ماسولكەكان و تووشی (لەرز) دەبینەوە!
ئینجا ئا ئەم بەڵایە كە تووشی میلەتی ئێمە بووەو وا سەد ساڵە لە جیهاندا یەكلا بۆتەوە، بەڵام لای ئێمە هەندێك خەڵك تێ نەگەشتووە، كاتێك كۆرۆناو پەتا دەگرێت و چۆقەی ددانی دێت، وا دەزانێت سەرمای بووەو دەلەرزێت، لە ڕاستیدا ئەمە نەخۆشە نەك سەرمای بوو بێت.
خوڵاسە، كە تووشی لەرزو تا بوویت، مەڵێ هی سەرماكەی ئەزمەڕە، تۆ نەخۆشیت بەڕێزم و پزیشك ببینە تكایە.
(د. زانیار ئاغال – پزیشكی پسپۆڕی هەناوی)