وەزارەتا دەرڤە یا ئەمریکا پێشبینی دکەت رۆسیا ل دەمەکێ نێزیک هێڕشی ئۆکراینا بکەت و داخواز ژ وەلاتیێن خۆ کر ژ وی وەلاتی دەرکەڤن.
ویندی شێرمن، جێگرا وەزیرێ دەرڤە یێ ئەمریکا گۆت: هەمی ئاماژە بۆ یەکێ دچن ڤلادیمێر پۆتین، سەرۆکێ رۆسیا تا نیڤا هەیڤا بهێت فەرمانا هێڕشکرنا رۆسیا بدەت.
ئەمریکا دیار کریە کو رۆسیا نێزیکی 100 هزار سەربازان ل سنۆرێن ئۆکراینا جێگیر کرینە و بەرهەڤیێن هێڕشی دکەت، لێ دێمیترۆ کۆلێبا، وەزیرێ دەرڤە یێ ئۆکراینا دبێژیت، ئەو هێزا رۆسیا ل سەر سنۆری کۆم کری تێرا وێ چەندێ ناکەن بشێن هێڕشەکا مەزن بۆ داگیرکرنا هەمی ئۆکراینا بکەن.
وەلاتێن رۆژئاڤا پێشتر هوشداری داینە رۆسیا ژ هەر جورە هێڕشەکێ و گەفێن توند ل مۆسکۆ کرینە کو ئەگەر هێڕشی کیێڤ بکەن، ئەو ژی دێ بەرسڤا وان دەن.