چارەسەریيا نه‌خوشيان ب رێكا ب فێقی
نوكه ڤه‌كولینان رێكه‌كا نوو یا دیاركری كو دبێژنێ چاره‌سه‌ری ب فێقی. هه‌ر فێقیه‌كی هنده‌ك ئه‌نزایم و كانزا و ڤیتامین دناڤدا هه‌نه و هاریكاریێ دكه‌ن بۆ چاره‌سه‌ركرنا گه‌له‌ك نه‌خۆشیان، هه‌ر فێقیه‌ك هاریكاره بۆ چاره‌سه‌ركرنا نه‌خۆشیه‌كا ده‌ستنیشانكری، دڤی بابه‌تی دا دێ گه‌له‌ك نه‌خۆشیان دیاركه‌ین و كا چ فێقی باشه بۆ چاره‌سه‌ریا وان، به‌لێ هشیاربن پێدڤی یه هه‌ر فێقیه‌كی ب رێژه‌یێن بلند نه‌خوین داكو زیانێن لاوه‌كی ژێ په‌یدانه‌بن.
* كێمخوینی: شاره‌زایێن ساخله‌میێ دبێژن باشترین چاره‌سه‌ری بۆ ڤێ نه‌خۆشیێ هژیر و خوخێن هشككری نه، ژبه‌ركو گه‌له‌ك كه‌رستێ ئاسنی دناڤدا هه‌یه كو هاریكاره بۆ گه‌هاندنا ئوكسجینی بۆ ناڤ هه‌موو پشكێن له‌شی، تووشبوونێ ب كێمخوینیێ كێم دكه‌ت، زانا شیره‌تان ل مه دكه‌ن كو رۆژانه سێ هژیران بخوین داكو سێتكه‌كێ ژ رێژه‌یا پێدڤی یا ئاسنی دابین بكه‌ت و دیسان پێدڤیه ده‌ه خوخێن هشككری بخوین داكو پشكا مایی دابین بكه‌ن و باشتره خوخ و هژیرێن هشككری پێكڤه بهێنه خوارن دگه‌ل له‌یموون و توی یا كو د پرن ژ ڤیتامین سی. هه‌ر د ڤی بیاڤی دا هنده‌ك زانایێن سه‌ر ب زانكویا (میرلاند) دیاركر كو هژیر هاریكارن بۆ چاره‌سه‌ركرنا نه‌خۆشیا پێتیبوونا هه‌ستییان، ژبه‌ركو گه‌له‌ك كالسیوم دناڤدا هه‌یه و ڤێ ڤه‌كولینێ دیاركر كو خوارنا پێنج كتێن هژیران رۆژانه هاریكاره بۆ دابینكرنا سێیتكه‌كی ژ كالسیومی و مه‌گنسیومی كو ته‌ڤاڤكه‌ره بۆ كارێ كالسیومی د پاراستنێ دا ژ نه‌خۆشیا پێتیبوونا هه‌ستیان دا.
* به‌د هه‌رسی: باشترین فێقی بۆ نه‌خوشیا به‌د هه‌رسكرنێ ل دووڤ داخویانیێن ڤه‌كوله‌رێن كه‌نه‌دی (ئه‌ناناسه) ژبه‌ركو گه‌له‌ك كه‌رستێ (برومیلین) دناڤدا هه‌یه و هاریماره بۆ هه‌رسكرنا خوارنێ و دشیاندایه پشتی هه‌ر دانه‌كێ خوارنێ بخون.
* دێم و ددانێن زه‌ر: توی فێقیه‌كێ نموونه‌یی یه بۆ ڤێ چه‌ندێ، ژبه‌ركو هنده‌ك ترشیێن ب ڤه‌ژاندن دناڤدا هه‌نه و دێمێ وه‌ستیای ڤه‌دكه‌ن، نوشدار شیره‌تان ل خودانێن دێمێن روینی دكه‌ن كو رۆژانه دێمێ خۆ ب توی یا پاقژ بكه‌ن و ته‌كه‌ز دكه‌ن كو خوارنا توویان ب شێوه‌یه‌كێ به‌رده‌وام هاریكاره بۆ سافیكرنا دێمی د ماوێ چه‌ند رۆژان دا و دیسان ئه‌و هاریكاره بۆ سپیكرنا ددانان و ته‌یساندنا وان.
*ئاریشه‌یێن عاده‌یا هه‌یڤانه: موز باشترین فێقی یه بۆ نه‌هێلانا ئاریشه‌یێن عاده‌یا هه‌یڤانه، ژبه‌ركو ب رێژه‌یا 15% ڤیتامین بی دناڤدا هه‌یه و هاریكاره بۆ چاره‌سه‌ریا ئالوزی و بێئارامی و ته‌نگه‌زاریێن دده‌مێ عاده‌یا هه‌یڤانه‌دا په‌یدادبن و دیسان موز یا پێكهاتیه ژ (كروم)ی، كو هاریكاره بۆ رێكخستنا ئاستێ شه‌كرێ د خوینێ دا و ئه‌ڤه شه‌هیه‌تا مرۆڤی بۆ شریناهیان كێم دكه‌ت.
*ئاریشه‌یێن پیستی: ژبۆ چاره‌سه‌ركرنا پنیێن سور ئه‌وێن ل سه‌ر پیستی دیاردبن، ڤه‌كوله‌رێن زانكویا هارفارد ته‌كه‌ز كرینه كو خوارنا تری هاریكاره بۆ بهێزكرنا دێوارێن مووده‌ماران و دیسان دبێژن تری گه‌له‌ك پێكهێنه‌رێن (بابوفلافینویدز) كو هاریكاره بۆ نه‌هێلانا خوین به‌ربوونا سڤك.
هه‌واڵی گرنگ
