تا ئێستا دایكان و باوكان حەز دەكەن منداڵەكانیان لە داهاتوودا ببنە پزیشك یان ئەندازیارو بۆ ئەمەش هەوڵی زۆر لەگەڵ منداڵەكانیان دەدەن، زۆرجاریش بەو هۆیەوە خۆیان و منداڵەكانیشیان تووشی دڵەڕاوكێی زۆردەبن جگە لەوەش خۆیان دەخەنە ژێر باری خەرجییەكی زۆرەوە، بەڵام پسپۆڕانی ئوستورالی قسەیەكی تر دەكەن و رێنمایی دایك و باوكان دەكەن واز لەو خەونە بهێنن و منداڵەكانیان بۆ كۆمەڵێك كارو پیشەی دیكە ئامادە بكەن و تواناكانیان لە چەند بوارێكی تردا گەشە پێبدەن كە لە داهاتوودا دەبنە ئەو پیشانەی باشترین داهاتیان دەبێت.

لێژنەی كارامەییە نیشتمانییەكانی ئوستورالیا، چەند پیشەیەكی دەستنیشان كردووە كە پێشبینی دەكرێت لە داهاتوودا زۆر برەوی هەبێت، لەوانەش چاودێری و كارە كۆمپیوتەرییەكان و توانای زانستی بواری تەكنەلۆژیای پەیوەندییەكان.

ئەو لێژنەیە ئاماژەی بەوە كردووە لە (10 – 20) ساڵی ئایندەدا هەندێك پیشە كە مرۆڤ ناتوانێت دەستبەرداری بێت وەك چاودێری كۆمەڵایەتی و هەندێك كاری رۆتینی دیكە كە پەیوەستە بە ژیانی مرۆڤەوە دەمێنن، بەڵام بەهۆی پێشكەوتنی تەكنەلۆژیاوە هەندێك پیشەی تر یان كەم دەبنەوە یان بە تەواوی لەناو دەچن و جێگەی خۆیان بۆ رۆبۆت و ئامێرە تەكنەلۆژییەكان چۆڵ دەكەن، بۆیە داوای لە دایك و باوكان كردووە هەر لە ئێستاوە منداڵەكانیان هان بدەن تواناكانیان لەو پیشانەی داهاتوودا گەشە پێبدەن.

ئەو لێژنەیە راستییەكی خستۆتەڕوو كە پیشەكانی پزیشكی و پەرستاری و ئەندازیاریش لەو مەترسی لە ناوچوونە بەدەر نیین، چونكە لە ئایندەیەكی نزیكدا رۆبۆتەكان كاری ئەوانیش رادەپەڕێنێت.

ئەمە لە كاتێكدایە پێگەی (The Telegraph) ی بەریتانی توێژینەوەیەكی تۆڕی (Deloitte) ی بڵاوكردۆتەوە كە تۆڕێكی خزمەتگوزاری پیشەیی فرەنەتەوەییەو تێیدا ئەوەی ئاشكراكردووە، تا ساڵی (2036) بە تەنها (100) هەزار كار لە كەرتی یاساییدا بەرەو لەناوچوون دەچن كە زۆربەیان كاری بچووكن.

وتەبێژی كۆمپانیای مەشقی پیشەیی بەریتانیا ئەوەی خستۆتەڕوو، مرۆڤ پێویستی بەوەیە سوود لە داهێنانەكانیان وەرگرن بۆ ئەوەی سەركەوتن بەدەست بهێنن و پێویستە دایكان و باوكان منداڵەكانیان هان بدەن بۆ بیركردنەوەی لە هەموو ئەو شتانەی پەیوەندییان بە زانست و تەكنەلۆژیاو ئەندازەو بیركارییەوە هەیە.

ئایندەی بازاڕی كار ...

بەشێك لەو كارو پیشانەی كە تا بیست ساڵی داهاتوو گەشە دەكەن و برەویان دەبێت ئەمانەن:

ئەندازیاری ئۆتۆمبێلی كارەبایی بێ شۆفێر:

ئەم بوارە پێویستی بە كەسانێك دەبێت كە شارەزابن لە پرۆگرامسازی كۆمپیوتەرو ئەندازەو بیركاری و دروستكردنی سیستەمی پرۆگرامی ژیری دەستكرد.

چاككردنەوەی سیستمە ئالی و رۆبۆتەكان :

ئەم كارەش دەبێت ئەو كەسانە بیكەن كە شارەزاییان هەیە لە چاككردنەوەو تاقیكردنەوەی رۆبۆتەكان بەر لە كاركردنیان و یان چاككردنەوەیان لەكاتی تێكچوون و لەكار كەوتنیان.

تەكنیكارانی بواری درۆنەكان :

دوای ئەوەی درۆنەكان لە سەرتاسەری جیهاندا بەشێوەیەكی بەرچاوو لە زۆربەی بوارەكاندا بەكاردەهێنرێن، بۆیە پێویستە كەسانێك لەم بوارەدا گەشە بە تواناكانیان بدەن بۆ داهێنان و نوێكاری.

دۆزینەوەكان لە بۆشایی ئاسماندا :

لەبەرئەوەی گەڕان بە دوای نهێنییەكانی ناو بۆشایی ئاسمان و گەردوون، بۆتە ئامانجێكی زانستی و كاری بەردەوام لەو بوارەدا دەكرێت و پێشكەوتنی بەرچاویش هاتۆتە دی، جیهان پێویستی بە زاناو ئەندازیاری زیاتر دەبێت بۆ كاركردن لەسەر ئەو تەكنەلۆژیایانەی پێویستن بۆ دروستكردنی موشەك و رۆكێت و سەتەلایتی پێشكەوتوو بە ئامانجی زیاتركردنی گەشتەكان بۆ سەر رووی مانگ و مەریخ و هەسارەكانی تریش، هەروەها پێویستە كەسانی شارەزاش هەبن بۆ دابینكردنی خۆراك و چارەسەركاری سروشتی تایبەتمەند بۆ یارمەتیدانی مرۆڤ تا بتوانن بەرگەی ژینگە نالەبارەكانی مانگ و هەسارەكانی تر بگرن.

پسپۆرانی تایبەتمەند لە بواری وزەی سەوز :

مەبەست لە وزەی سەوزیش دۆزینەوەی جێگرەوەی ئەو وزانەیە كە بوونەتە هۆی پیسكردنی ژینگەو گۆڕانكارییەكانی كەشوهەوای زەوی.

بواری پرینتەری سێ دووری :

لەبەرئەوەی پرنتی سێ دووری وەك شۆڕشێك بوو لە زۆر بواردا لەوانە بواری پزیشكی و دروستكردنی خانوو، بۆیە جیهان پێویستی بە كەسانی شارەزا دەبێت بۆ ئەوەی پرنتی سێ دووری لە ئاستێكی بەرفراواندا خێراترو كەم خەرجیتر بكەن.

پسپۆڕانی تەكنەلۆژیای زیندەیی :

لە ئایندەیەكی نزیكدا ئەم جۆرە پسپۆڕییە خواستێكی زۆری لەسەر دەبێت بە تایبەت ئەو كارانەی پەیوەستن بە چاككردنەوەی خانەكانی مرۆڤ و كۆئەندامی دەمار.

ئەو كارانەی لە داهاتوودا داهاتێكی زۆریان دەبێت ...

(نیكۆلاس بادیمنتۆن) چاودێری ستراتیژی سەبارەت بە كارو پیشەكانی داهاتوو پێشبینی دەكات تا ساڵی (2040) ئەم پیشانە زۆرترین موچەی دەبێت.

- ئەوانەی دەبنە زانای مۆراڵەكان لە بواری داهێنانە زانستییەكاندا.

- چاڵاكەكانی بواری هونەرو داهێنان.

ئەو پسپۆڕە دەڵێت: هەرچەندە زانست گەشەكردنی بەرچاو بە خۆوە دەبینێت، بەڵام هونەر وەك بەشێكی جیانەبووە وە لە ژیانی مرۆڤ هەر گرنگی خۆی دەبێت، بەڵام پێشبینی دەكرێت كە هونەریش دەستی زانستی بەركەوێت و تێكەڵییەك لە نێوان و هونەرو تەكنەلۆژیادا دروست بێت.

- مەشقپێكەرانی ئابووری زانیارییەكان.

- زانایانی زانیارییەكان.

- پسپۆڕانی ئاسایشی سایبرانی و زانیاری چەواشەكاری.

بەهۆی ئەوەی رەنگە لە ئایندەدا هێرشە ئەلیكترۆنییەكان زیاتر بن، بۆیە پسپۆڕی بواری ئاسایشی سایبرانی زۆر گرنگە تا كەسەكان لەو هێرشانەو لە زانیارییە چەواشەكارییەكان و لێكەوتەكانی بپارێزن.

كەشتی نووح