فه‌رمانده‌یه‌كی باڵای سه‌ربازی ئێرانی رایگه‌یاند، وڵاته‌كه‌ی وەڵامی توندی "قەواری زایۆنی دەدەینەوە" و ئه‌و خه‌ونه‌ ده‌به‌نه‌ گۆڕه‌وه‌ كه‌ ئێران وەڵامی تاوانی كوشتنی ئیسماعیل هەنیە، سه‌رۆكی پێشوی مه‌كته‌بی سیاسی حه‌ماس نه‌داته‌وه‌.

به‌پێی ئاژانسی میهری ئێرانی، عەمید عەبدولڵاهی، جێگری كاروباری هەماهەنگی لە دەستەی ئەركانی هێزە چەكدارەكان باسی له‌ تاوانەکانی زایۆنیستی دژ بە فەڵەستینییەکان کرد و ڕەخنەی لە دەسەڵاتی ڕۆژئاوا گرت کە "بێباکانە بەرامبەر بە تاوانەکانی ڕژێمی قۆرخکار دەمێنێتەوە".

ناوبراو ئاماژه‌ی به‌وه‌شكردوە: "تاوانەکانی ئەم دواییەی ڕژێمی زایۆنی بوەهۆی ئەوەی خەڵکی ئازادیخوازی جیهان ڕوخساری ڕاستەقینەی بەکرێگیراوانی جیهان بناسن".

له‌باره‌ی وه‌ڵامی ئێران بۆ سه‌ر ئیسرائیل له‌ تۆڵه‌ی شەهید ئیسماعیل هه‌نییه‌، سه‌رۆكی پێشوی مه‌كته‌بی سیاسی بزوتنه‌وه‌ی حه‌ماس، رایگه‌یاند، "ئێران وەڵامێکی توندی دوژمن دەداتەوە بۆ شەهیدبونی ئیسماعیلی میوان، بەڵام کاتی وەڵامدانەوەکە ڕون نییە و ڕژێمی زایۆنی خەونی ئەوە دەبینێت کە وەڵامدانەوەی ئێران بۆ ئەو تاوانە ڕونه‌دات، به‌ڵام هەرگیز نایەتە دی".