لیژنەیەکی ئەنجوومەنی نوێنەرانی عێراق بۆ لێکۆڵێنەوە لە چۆنیەتی خەرجکردنی بودجە و مووچەی هەرێمی کوردستان پێکهێنراوە و بڕیارە پرسی مووچەی مانگی 12 یەکلایی بکاتەوە.
لە فراکسیۆنە کوردستانییەکان هەریەکە لە نەرمین مەعروف و ئیخڵاس دلێمی ئەندامی لیژنەکەن، لەو بارەیەوە نەرمین مەعروف بە میدیای یەكێتی راگەیاندووە:، لیژنەکە زۆر نییە پێکهاتووە و لە داهاتوودا زانیاریی لەسەر ئەو پرسە دەخەنەڕوو کە جۆرێک لێکتێنەگەیشتن لەنێوان وەزارەتی دارایی عێراق و هەرێمی کوردستان هەبووە".
لای خۆیەوە غەریب ئەحمەد، ئەندامی ئەنجوومەنی نوێنەرانی عێراق راگەیاندوە" داتاکانی وەزارەتی دارایی عێراق زۆر روونن، مووچەی مانگی 12ـی ساڵی 2024 لای حکومەتی هەرێمی کوردستانە و دابەشی ناکات".
ناوبراو ئاماژەی بەوەشکرد: لە سەرەتای ساڵی 2024 حکومەتی هەرێمی کوردستان زۆر "خەمساردانە" مامەڵەی لەگەڵ حکومەتی عێراق کردووە و ئەو داواکارییانەی بەغداد بەتایبەت وەزارەتی دارایی عێراق هەیبوون بەشێکی زۆریانی جێبەجێنەکردووە، یەکێک لەوانە رادەستکردنی داهاتی نانەوتیی و پاککردنەوەی لیستی مووچە بووە".