وەزیری دەرەوەی تورکیا ڕایگەیاند، ئەنقەرە بە وردی چاودێریی ڕێککەوتنی نێوان حکوومەتی سووریا و هێزەکانی سووریای دیموکرات دەکات کە لەلایەن ئەمەریکاوە پاڵپشتی دەکرێت. هەروەها وتیشی: نیگەرانە لە ئەگەری مەترسییەکان بۆ سەر داهاتووی ئاسایشی تورکیا.
هاکان فیدان وەزیری دەرەوەی تورکیا لە میانی چاوپێکەوتنێکدا لەگەڵ کەناڵی تیڤی 100ـی تورکی ڕایگەیاند : لە سەردانەکەیدا بۆ سووریا ڕۆژی پێنجشەممە، 13ـی ئاداری 2025، نیگەرانی تورکیای بە بەرپرسانی سووریا گەیاندووە.
ئاماژەی بەوەشكردووە: ئەگەر ڕێککەوتنێک بە نیازێکی پاک ئیمزا کرابێت، بەردەوام دەبێت، هەرچەند ڕەنگە لە داهاتوودا هەندێک کێشە سەر هەڵ بدات، ئێمە وەک تورکیا لە نزیکەوە چاودێریی ئەم بابەتە دەکەین.
ڕێککەوتن و یەکخستنی هێزەکانی سووریای دیموکرات لەگەڵ حکوومەتی نوێی سووریا دوای پێکدادانە توندوتیژییەکەی هەفتەی ڕابردوو لە نێوان هێزە ئەمنییەکانی حکوومەت نوێی سووریا و پاشماوەکانی ڕژێمی ڕووخاوی بەشار ئەسەد هات.
هەروەها ئاماژەی بەوەش کرد "تورکیا ئەو ڕێککەوتنە وەک پێدانی ئۆتۆنۆمی بە هێزەکانی سووریای دیموکرات نابینێت."
