سیاسەتی دەسەڵات تەنیا بێئومێدکردنی خەڵکە
دەسەڵات لە نائومێدکردنی خەڵکدا براوەیە
دوو لایەنە دەسەڵاتدارەکەی هەرێمی کوردستان بە ئەنقەست و مەبەست بەردەوام کار لەسەر ئەوە دەکەن خەڵک بێئومێد بکەن لە گۆڕانکاری و خەون بینین بە ژیان و داهاتوویەکی باشترەوە، بۆ ئەوەش هەموو رێگەیەک دەگرنەبەر.
هەردوو پارتی حوکمڕان، پارتیی دیموکراتی کوردستان و یەکێتی نیشتمانیی کوردستان، هیچ دەرفەرتێک لەدەست نادەن بۆ ئەوەی ئەو ئامانجەیان بەدیبهێنن کە بڵاوکردنەوەی رەشبینیی و نائومێدی و کوشتنی خەونی گۆڕانکاریی و باشتربوونە.
نموونەکان زۆرن کە چۆن دەسەڵات دەیەوێ لە رێگەیانەوە رۆحمان بکوژێت و خەونمان لە گۆڕ بنێت و هیوامان بۆ ئاییندە لەناوببات.
بۆ نموونە، کە هەڵبژاردن دەکرێت لەڕێگەی تەزویر و ساختەکاری وادەکات خەڵک چیدی ئومێدیان بە گۆڕانکاری لەڕێگەی هەڵبژاردن نەمێنێت. ئەگەر هەڵبژاردنەکەش پاک بێت و تەزویر کەم بکرێت ئەوا هەر دەسەڵات خۆی دەنگۆی تەزویر بڵاودەکاتەوە بۆ ئەوەی خەڵک هیوایان بە گۆڕینی دەسەڵات لەڕێگەی سندوقی دەنگدان لاوازبێت و نەچنە دەنگدان. لەم پرسەشدا سەرکەوتوو بوون، ئەوەتا زۆرینەی خەڵک لە هەموو هەڵبژاردنەکاندا بایکۆت دەکەن و بەوەش دوو حزبە دەسەڵاتدارەکە لەرێگەی ئەندامانی خۆیانەوە دەبنەوە زۆرینەی پەرلەمان.
نموونەیەکی دیکە بۆ بڵاوکردنەوەی رەشبینی و نەهێشتنی هیوا بۆ داهاتوو دروستکردنی لایەنی ئۆپۆزسیۆنی ساختەیە کە لەڕێگەیەوە دەیەوێ دۆخێک دروستبکات خەڵک متمانە بە هیچ لایەن و حزبێک نەکەن و پێیانوابێت هەموو حزبەکان وەک یەکتر وان و جیاوازییان نییە. لەم رێگەشدا سەرکەوتوو بوون، چونکە لە هەرێمی کوردستان هەر لەماوەی ١٠ ساڵی رابردوودا زیاتر لە ١٠ حزب و قەوارە و لایەن دروستبوون کە هیچیان موعارەزەی راستەقینەی دەسەڵات نەبوون بەڵکو بۆ لەتکردنی دەنگی ناڕازی دروستبوون و هەندێکجار کەسێک لەپێناو دەستکەوتنی پۆستێک حزبێکی دروستکردووە.
بێگومان پێنەدانی مافە سەرەتاییەکانی وەک ئازادی رادەربڕین و ئازادی میدیایی، بێبەشکردنی خەڵک لە سەروەت و سامانی وڵات و نەدانی مووچە و دابینن نەکردنی خزمەتگوزارییە سەرەتاییەکانی وەک رێگای باش و کارەبا و ئاوی پاک هەموویان هۆکاری دیکەن کە خەڵک نائومێد بن.
گرفتەکەش ئەوەیە هەموو لە هەر کۆمەڵگە و وڵاتێکدا بێت، رۆحی نائومێد، گەلی پاسیڤ و رەشبین خەڵاتە بۆ ئەو بەرپرسانەی کە دەیانەوێ حوکم و دەسەڵاتی خۆیان بەسەر خەڵکدا بسەپێنن.
سامان حوسێن/ بەریتانیا
