لەمڕۆوە شەپۆلێکی بارانبارین هەرێمی کوردستان دەگرێتەوە و هەروەها بەفر لە کوێستانەکان دەبارێت.
بەگوێرەی پێشبینیی کەشناسیی هەرێمی کوردستان، ئەمڕۆ پێنج شەممە ئاسمان هەور و نیمچەهەور دەبێت، لەگەڵ نمەباران لە تەواوی ناوچە سنووریەکانی باکوور و رۆژهەڵاتی هەرێمی کوردستان، لەناوچە بەرزەکان بەفریش دەبارێت.
هەروەها دوای نیوەڕۆ دەگۆڕێت بۆ هەورەتریشقە و بروسکە لە سەنتەری سلێمانی و هەڵەبجە، هەروەها ئەگەری تۆزێکی سووک هەیە، وە پلەکانی گەرما ٤ - ٦ پلەی سیلیزی نزمدەبنەوە بەراورد بە تۆمارکراوەکانی دوێنێ.
لەوبارەیەوە پێشبینیەکانیان بۆ سبەیش بڵاکردەوە کە سبەی هەینی ئاسمان هەور و نیمچەهەور دەبێت، لەگەڵ دابارین لەزۆربەی ناوچەکانی پارێزگای دهۆک، لەگەڵ کەمێک بەفر لەناوچە شاخاوییە سنووریەکان.
