وەزارەتی دەرەوەی عێراق بڵاوی كردەوە: شەوی ڕابردوو دوو كەسی نەناسراو بە ماتۆڕسكیل و بە بەكارهێنانی كڵاشینكۆڤ تەقەیان لە باڵەخانەی كۆنسووڵخانەی وڵاتەكەمان لە ئیستەنبووڵ كرد و هەڵاتن. تەقەكەرەكان 8 گوللـەیان بە باڵەخانەكەوە ناوە.
ئەوەشی خستەڕوو: راستەوخۆ دوای رووداوەكە، كۆنسووڵ و كارمەندانی كۆنسووڵخانەكەمان خۆیان گەیاندە شوێنی رووداوەكەو هێزە ئەمنییەكانی توركیاش دەستبەجێ تەواوی رێگەكانی چوون و هاتنیان بۆ كۆنسووڵخانەكە داخست، لێكۆڵینەوە و كۆكردنەوەی بەڵگەكان و رێوشوێنە ئەمنییەكانیان بە ئامادەبوونی كارمەندانی كۆنسووڵخانەكەمان گرتەبەر.
لە ڕاگەیەندراوەكەدا هاتووە: وەزارەتەكەمان لەگەڵ لایەنە پەیوەندیدارەكانی توركیا لەسەر هێڵە بۆ ئاگاداربوون و وەرگرتنی زانیاریی نوێ لەبارەی هێرشەكە و بەپێی یاسا نێودەوڵەتییەكان ئەركی حكومەتی توركیایە نێردە دیپلۆماسییەكان بپارێزێت و رێوشوێنی ئەمنیی تووندوتۆڵ بگرێتەبەر.
