ئێک ژ ئارمانجێن سەرەکی یێن رێکخراوا نەتەوەیێن ئێکگرتی و ئەگەرێن دروستکرنا وێ ل سالا ١٩٤٥ێ، بەرقەرارکرنا ئەمن و ئاسایشا نێڤدەولەتی بوو ، و رێکێن ئاشتیانە جھێ شەر و خرابکاریان بگرن . ژبوی کو شەر ب دوماھی بھێن و کوملەگھێن مروڤایەتی ب ئاشتیانە بژین .

دڤی دەمێ دا کو سوریا ب گشتی و باژێرێ حەلەبێ ب تایبەتی د شەر و وێرانکرنەکا مەزن دایە . و رۆژانە ب سەدان ھاولاتێن سڤیل ل حەلەبێ دبنە قوربانیێن ھێرشێن سوپایێ سوریا و فروکەیێن روسیا . فەرە پسیار بھێتە کرن رۆلێ رێکخراوا نەتەوەیێن ئێکگرتی چیە بو بدوماھی ئینانا ڤی شەری .

بو بەرسڤدانا ڤێ پسیارێ چەند رونکرنەک پێتڤی نە . ژبەرکو ھندەک نەوەکھەڤی ھەنە دناڤ بەرا ئارمانجێن رێکخراوێ و میساقێ وێ .

جڤاتا ئاسایشێ کو ئێک ژ دەزگەھێن سەرەکی یێن رێکخراوا نەتەوەیێ ئێکگرتی یە ، لدویڤ میساقێ وێ رێکخراوێ ، پێک دھێت ژ پازدە ئەندامان کو ھەرئێک نوینەراتیا وەڵاتەکی دکەت ،و پێنچ ژوان ئەندامان د دائیمی نە و دەە ژوان نە د دائیمی نە ، و ئەو پێنچ ئەندامێن دائیمێ مافێ ڤیتویێ یێ ھەی . ئانکو ھەر بریارەکا ژ جڤاتا ئاسایشی بدەرکەڤیت پێتڤی ب نەە دەنگان ھەیە ھەتا کو بھێتە پەسەندکرن . لێ ھەر پێنچ ئەندامێن مافێ ڤیتویێ ھەی ئەگەر ئێک ژوان دەنگی لسەر بریارێ نەدەت ئەگەر ھەمی ئەندامێن دی دەنگی بدەن ژی ئەو بریارە نا ھێتە پەسەندکرن .
روسیا ژی ئێک ژ وان پێنچ ئەندامێن دائیمی یە د جڤاتا ئاسایشێ یا رێکخراوا نەتەوەیێن ئێکگرتی دا . و ھەر بریارەکا جڤات بدەت بێی رازیبوونا روسیا ناھێتە پەسەندکرن .

د کریزا سوریا یێ ژی دا ژبەرکو روسیا بەرژەوەندیێن سیاسی ل وی وەڵاتی ھەنە و ئەو دخوازیت ب رێکا پشتگیری کرنا رژێما سوریا بو خوە نفوزەکێ ل دەڤەری َچێکەت . ھەر پرۆژەکێ بھێتە جڤاتا ئاسایشی دەربارەی راوەستاندنا شەری ل سوریا ، روسیا مافێ ڤیتویێ بکاردئینیت .

ئانکو بڤی شێوەی نەتەوەیێن ئێکگرتی دەستھەلاتا راوەستاندنا شەری ل سوریایێ نینە ، و ب ڤیتویەکێ روسیا دشێت درێژیێ ب شەری بدەت .

ئەگەر ب پرسین رولێ دادگەھا داد یا نێڤدەولەتی دڤێ چەندێ دا چیە ؟؟ .. ژ بەرکو دادگەھا داد د چوارچوڤەیێ جڤاکێ نێڤدەولەتی دا کاردکەت جیاوازی ھەیە دگەل دادگەھێن ناڤخویی ، و وێ ماف یێ ھەیی بتنێ پێرابوونان دگەل وان وەلاتان بکەت یێن ئەندام د دادگەھێ دا . و ژبوی کو

روسیا مەرەمێن خو ب ئارمانج بگەھینیت ، ئەندامەتیا خو ژدادگەھا داد ڤە کێشایە .
و بڤێ چەندێ روسیا ب دلێ خو شەری ل سوریا دکەت ، ل جڤاتا ئاسایشێ کەس نەشێت پرۆژەیێ وێ ب راوەستینیت و ل دادگەھا داد ژی کەس نەشێت پێرابوونان دگەل وەرگریت . و دەرئەنجام خەلکێ سڤیل دبیتە قوربانی و شەر بەردەوامیێ دکێشیت . و ئارمانجێن نەتەوەیێن ئێکگرتی ژی دکەڤنە ژێر چەندین پسیاران .

لڤێرێ دیاردبیت کو مافێ ڤیتویێ ب شێوێ ھەیی ئێک ژ خالێن لاوازیێ یێن نەتەوەیێن ئێکگرتی و یاسا یا نێڤدەوەلەتی یا گشتی یە . لەو بو بجە ئینان ئارمانجێن کو ژبەر ھاتیە دروستکرن پێتڤیە نەتەوەیێن ئێکگرتی رێکە چارەیەکێ بو مافێ ڤیتویێ ببینیت . و ئەڤ چەندە ژی کارەک ئاسان نینە و ئێکجار قورسە . چونکە گھورینا میساقی پێتڤی ب سەروشنی رێککەفتنە کا نێڤدەولەتی ھەیە دناڤبەرا ھەمی ئەندامێن رێکخراوا نەتەوەیێن ئێکگرتی .