نڤێسین: یەحیا جاد
وەرگێران: وەحید سندی

گەلەک جاران پرسیار دھێتکرن: ئەگەر خودێ دادپەروەرە؛ ئەرێ بۆچی ب ڤێ زۆلم و ستەما نوکە ڕازییە؟!! ئەگەر خودێ شیان ھەنە بۆچی ناگوھورت؟!! زارۆکەکێ بچویک دێ ژ برسان مرت؛ ئەرێ چ گونھا خوە ھەیە؟ بۆچی خودێ دڤێت ئەوی ب جەربینت؟!
بەرسڤ:

کێشە لڤێرەیە دەما ئەم نزانین و مە ژبیرکری دەرئەنجامێن تشتی ژ دەڤ خودێ یە، لێ خودێ مرۆڤێن لسەر موکەلف کرین و ئەڤ کریارە یا ئێخستی د ستوویێ واندا، ئەوێن ژێ کرین بەرپرس، دێ حسابێ لگەل وان کەت لسەر ڤێ ئاریشێ و ھەر ئاریشەیەکا دی، خودێ ئەڤ دنیایە یا دانایی داکۆ مە مرۆڤان تێدا بکەت بەرپرس و ب جەربینت، ئانکۆ مە بکەت د ئەزموونێدا، مەرەم ژ بەرپرسیارەتی و پێراِبوونێ (التکلیف)- د دیتنا مە مرۆڤاندا- ئەم یێن بەرپرسین ژ پەیداکرنا زۆلمێ و ژ ڕاکرنا وێ دەما کەسەک د کەڤت تێدا.

ئەڤ چەندە بەرپرسیارەتییا مەیە – مرۆڤان- نەبەرپرسیارەتییا خودێ یە، خودێ ئەمێن پێ ڕاسپاردین، دێ حسابێ لگەل مە کەت، ئەڤا د ناڤ گورەپانا ڤی ئەردیدا ڕوو ددەت بەرپرسیارەتییا مە مرۆڤایە، ھەر تشتەکا بسەرێ مرۆڤاتیێ بھێت پرسیار دێ ژ مە مرۆڤان ھێتکرن، و نە ژ کەسێ دی.

ئەڤ برسیاتییا د ناڤ جیھانێدا پەیدابووی کی ژێ بەرپرسە؟

ئەرێ ئاریشەیا خودێ یە و ئەو ژێ بەرپرسە؟
ئەرێ ئەو کینە خارنێ دھاڤێژن د ناڤ زبلدانێن کلێشیدا؛ زارۆکژی ژ برسان دمرن؟!
ئەرێ ئەو کینە دبینن زارۆکێن خارنێ لسەر زبلدانان دخۆن و ئەو وان خودان ناکەن؟!
ئەرێ ئەو کینە ڤان ڤێلا و بالەخانێن ھندە مەزن و بلند ئاڤادکەن ھەتاکۆ عەوران دبرن؛ زارۆکژی ژ برسان دمرن؟!
ئەرێ ئەو کینە مالی لسەر مالی ددەینن و پارەی ھەر کۆمدکەن؛ زارۆکژی ژ برسان دمرن؟!
ئەرێ خودێ یە ڤان کاران و ھێشتاژی دکەت یان مرۆڤن؟!
سالانە ملیون و نیڤ زارۆک ژ برسان دمرن ژ برسان یانژی ژبەر خرابییا خارنێ، ئەرێ تو دزانی چەند پارە بەسە بۆ دابینکرنا خارنا (٥)ملیون زارۆکان؟!
ئێک زارۆکێ بتنێ ڕۆژانە پێدڤی ب (١٠)دۆلارایە، ئانکۆ (٣٦٥٠) دۆلار د سالەکێدا، ب ڤی ڕەنگی بۆ ڕێژا (٥) ملیون زارۆکان (١٨.٢٥) ملیار دۆلار د سالەکێدا پێدڤینە.

ئەرێ تو د زانی مال و سامانێ ھندەک ژ دەستھەلاتدارێن عەرەب چەندە؟!

مال و سامانێ پادشاھێ (سعودیە) دگەھت (١٨) ملیار دۆلاران: ئانکۆ پارێ ڤی کەسی بتنێ تێرا (٥) ملیون زارۆکان ھەیە بۆ سالەکا تمام.
مال و سامانێ خەلیفە (ال نھیان) (١٥) ملیار دۆلارە، دیسان (١٠) دەستھەلاتدارێن عەرەبی مال و سامانێ وان دگەھت (٤٠) ملیار دۆلاران!! ئانکۆ پارێ وان بەشێ (٥) ملیون زارۆکان دکەت بۆ ماوێ زێدەتری (٢) سالان!!

ئەرێ تو د زانی مال و سامانێ (٢٠) کەسێن زەنگینێن جیھانی دگەھت چەندێ؟! ئەوژی (٨١٥) ملیار دۆلاران، ئانکۆ ئەڤ ڕێژا پارەیی تێرا (٥) ملیار زارۆکان دکەت بۆ ماوێ (٤٥) سالان!! دیسان ئەرێ تو د زانی مال و سامانێ (٣٠) کەسێن ئێکێ یێن جیھانی دگەھت چەندێ ؟! ڕێژا پارێ ڤان سیھـ کەسان دگەە (١١٢٣) ملیار دۆلاران! ئانکۆ پارێ ڤێ ھژمارا کەسان تێرا (٥) ملیون زارۆکان دکەت بۆ ماوێ (٦٢) سالان، گونەھا مەزنژی لڤێرەیە ئەڤ داھاتە ھەمی د دەستێ ڤێ خەلکیدا و ھێشتا ھندەک کەسێن نەزان ئەڤێ خەلەتییا دابەشکرنا داھاتی و زۆلما وان دکەن د ستوویێ خودێ دا و ئەز بێژم باش یا دیارە ژ کارێ مرۆڤایە و ئەو ئەزموونە یا ئەو تێدا!!

خودێ زارۆکێ برسی ناکۆژت، بەلکۆ کەسێن زۆلمکار و ستەمکار وی دکۆژن، ئەو دەستھەلاتدارێن زکێ خوە ژ مالێ شەعبێ کری تێر ئەو دکۆژن، دیسان کەسێن دەرەبەگ و نەھنگێن سەرمایەداری وان دکۆژن، خودانێن خەزینان وان دکۆژن، ئەو حوکمەتێن نەدروست د ڕێڤەبرنا خوەدا ئەو دکۆژن، ئەو کەسێن مالێ خوە لسەر تشتێن ب کێر نەھاتی خەرج دکەن ئەو ڤان زارۆکان دکۆژن، ئەم وان دکۆژین ئەگەر ئەم ژیانێ بۆ وان پەیدانەکەین.
ئەرێ ھوین د زانن ھەتا ئەو دەستەیا جیھانییا پرۆگرامێ خوارنێ ژی (WFP) جوداھیێ د ناڤبەرا جوتیارێن ژن و زەلامدا دکەن د دابەشکرنا ھاریکارییاندا لسەر وان، داکۆ ھندەکان بسەر بێخن و ھندەکانژی بمرینن، ھیچ وەکھەڤیەکێ د ھاریکاریێن خوەدا ناکەن، ھاتییە دیارکرن ڕێژا کەسێن برسی د جیھانێدا (١٥٠) ملیون کەسن؟! دیسان ئەرێ ھوین د زانن نڤێسینگەھا نیشتیمانییا ئاماران ل بریتانیا دبێژت: خەلکێن بریتانیا بتنێ سالانە (٢٠) ملیار دۆلاران ل ماددێن بێھوشکەر دمەزێخت؟! ئەڤ برا پارەیی ژی تێرا (٥) ملیون زارۆکان ھەیە بۆ ماوێ زێدەتری سالەکێ!! ئەرێ ھوین د زانن مرۆڤ چەند پارەیی د ماددێن فاحیشێدا دمەزێخن؟! بتنێ ل (٤) وەلاتێن (ئەمریکا، چین، یابان، کوریا) ئەو پارێ بۆ ڤی ئالیی دھێت خەرجکرن دگەھت (٨٦) ملیار دۆلاران سالانە،

ئەڤ ڕێژا پارەیی ژی تێرا (٥) ملیون زارۆکان ھەیە بۆ ماوێ (٥٠) سالان!!

ئەرێ کی ژ ڤێ ھەمیێ بەرپرسە؟ خودێ، یانژی مرۆڤێن خراپکار ئەڤێن دڤێت مەزنترین حساب لسەرا ڤێ یەکێ لگەل وان بھێتکرن؟!
"حسام مۆنس" گوتنەکێ دەربارەی "چارلز داروین"ی دبێژت: داروینی وژدان و ئیمان ژ پتریا دەستھەلاتدارێن ڕۆژھەلاتی، بەلکۆ ژ پتریا مەژی ھەبوو، دەمێ د ناڤ ئێک ژ پەرتووکێن خوەدا گوتی: "مادەم ئەڤ نەخوەشیی و ئالۆزییا ب سەرێ خەلکێ ھەژار دھێت نە ژ یاسایا ڕێککەڤتنا سرۆشتی یە، بەلکۆ بەرۆڤاژی ژ ئەگەرا دەزگەھێن مرۆڤییە، کەواتە گونەھا مە گەلەکا مەزنە!".

دیسان "محمد الغزالی" دبێژت: "ژ لاوازییا ھندەک کەسان: ئەگەر ئەرد گەندەلبوو، ئێکسەر گونەھێ دکەن د ستوویێ ئەسمانیدا! ل شوینا ئەڤ کەسە ب کارێ خوە ڕابن و گەندەلیێ ژ ناڤ ببەن و دادیێ بینن، گەلەک خوە مەزن دکەن و گوتنێن مەزن لسەر دینی و ڕەبێ دینی دبێژن!".

ھەروەسا "احمد خیری العمری" دبێژت:"برایێن مولحدێن نوی دبێژن: کا خودێ؛ ئەرێ ما ڤێ سزادانا زارۆکان و مرۆڤان نابینت...ھتد؟! ئەو بەرۆڤاژی د ئەڤێ فەرمانێ دگەھن؛ چونکی ئەو وەسا ھەست دکەن جیھان "ئەزموونا خودێ"یە، لسەر وی پێدڤییە ھەمی دەمان شیانێن خوە نیشانی خەلکێ بدەت داکۆ باوەریێ پێ بینن، د ڕاستیدا ئەڤ پرسە بەرۆڤاژییە ب تەمامی؛ چونکی جیھان "ئەزموونا مە"یە، لسەر مە پێدڤییە ئەم کریارا ھەر باش ئەنجامبدەین، ئەم ئەڤێ سزایا خەلک ب سەرێ خەلکێ دئینت کێم بکەین و دادیێ د ئەڤی ئەردیدا بەلاڤبکەین".

ل دۆماھیێ ژی (یحی جاد) دبێژت: "ھیڤی دکەم ھزرا خوە د ڤێ چەندێدا بکەن دەما خودێ دبێژت:

:"لَقَدْ أَرْسَلْنَا رُسُلَنَا بِالْبَيِّنَاتِ وَأَنزَلْنَا مَعَهُمُ الْكِتَابَ وَالْمِيزَانَ لِيَقُومَ النَّاسُ بِالْقِسْطِ" الحديد: 25.