لیژنەی دەسپاكی لە ئەنجومەنی نوێنەرانی عێراق دۆسییەی گەندەڵی شەش وەزارەت و دوو دەستە دەداتە داواكاری گشتی و داوای لێكۆڵینەوە لەو پارانە دەكات كە لەدوای (2003)ـەوە براونەتە دەرەوەی وڵات.
عەبدولئەمیر ئەلمیاحی ، ئەندامی لیژنەی دەسپاكی لە ئەنجومەنی نوێنەرانی عێراق رایگەیاند : " لەئێستادا دۆسییەی گەندەڵی زیاتر لە (6) وەزارەت و (2) دەستە دراوەتە داواكاری گشتی و دەستەی دەسپاكی عێراقی".
وتیشی : " دۆسییەكان تایبەتن بەهەریەكە لە وەزارەتەكانی نەوت و كارەبا و تەندروستی و پیشەسازی و بازرگانی و كشتوكاڵ و دەستەی گومركەكان و دەروازە سنورییەكان".
ئەوەیشی راگەیاند : " تا ئێستا هیچ لێكۆڵینەوەیەك لەبارەی ئەم دۆسییانە نەكراوە و پێویستە پەلە بكرێت لە بردنی ئەم دۆسیانە بۆ دادگا چونكە هەر خاوبوونەوەیەك لەم كارە ، عێراق بەرەو قەیرانێكی دیكە دەبات".
لەكۆتاییدا ئەندامەكەی ئەنجومەنی نوێنەران وتی : " داوامان كردووە لێكۆڵینەوە بكرێت لەو كەسانەی بە شێوەی نایاسایی لەدوای (2003) پارەی عێراقیان بردۆتە دەرەوە و لەگەڵ وڵاتان قسە بكرێت بۆ گەراندنەوەی ئەو پارانە".