پزیشكان لە كۆریای باشوور رایدەگەینن ، تووشبووێكی كۆرۆنا دوای ئەنجامدانی نەشتەرگەری چاندنەوەی سییەكانی لە نەخۆشییەكەی چاكبوویەوە.
لە كۆتاییەكانی مانگی شوباتی رابردوو ئافرەتێكی تەمەن (50) ساڵان تووشی كۆرۆنابوون ، ماوەی (16) هەفتە لە نەخۆشخانە و لەژێر ئامێری تایبەتی ئۆكسجین مایەوە.
پاك سۆنگ هون ، پزیشك و پسپۆری سییەكان لە نەخۆشخانەی دڵی پیرۆز لە زانكۆی هالیم رایگەیاند : " دەرمانی (كلوروكین)ـی تایبەت بە مەلاریا و (كالیترا) نەیتوانی چارەسەری ئەم خانمە بكات ، بۆیە هیچ بژاردەیەكی دیكەمان نەما جگە لە نەشتەرگەری".
وتیشی : " نەشتەرگەرییەكەمان بەسەركەوتوویی ئەنجامدا ، ئەمە نۆیەم نەشتەرگەری بوو لەهەموو جیهان ئەنجامبدرێت ، پێشتر لە چین (6) نەشتەرگەری و ئەمریكا و ئوسترالیا ئەنجامدرابوو".
لەكۆتایی لێدوانەكەی پزیشكی نەشتەرگەرییەكە رایگەیاند : " كاتێك دوو سییەكەی تووشبووی كۆرۆنامان بینی شۆك بووین , چونكە هاوشێوەی بەردی لێهاتبوو بەهۆی رەق بوونییەوە".