ئەندامێكی ئەنجومەنی نوێنەرانی عێراق رایدەگەینێت ، نابێت رێگە بە گەرانەوەی هێزی پێشمەرگە بدرێت بۆ شاری كەركوك و داوا لەسەرۆكی ئەنجومەنی وەزیران دەكات رێگە بەگەرانەوەیان نەدات.
ئەلبعێجی لەمیانی لێدوانێكیدا وتی : " لەراستیدا رەتدانەوەیەكی زۆر هەیە لە خەڵكی كەركوك بۆ گەرانەوەی پێشمەرگە بۆ ناوچەكە ، دوو گەورەترین پێكهاتەی كەركوك كە توركمان و عەرەبن دژی گەرانەوەی پێشمەرگەن بۆ شارەكە".
وتیشی : " ناكرێت داخوازییەكانی ئەم پێكهاتانە فەرامۆش بكرێت ، كەركوك واتە عێراقێكی بچووك ، دەبێت حكومەتی ئیتیحادی دەسەڵاتەكانی خۆی لێرە جێبەجێ بكات و رێگە بە هاتنەوەی هێزی پێشمەرگە نەدات".
لەكۆتاییدا ئەندامی پەرلەمانی عێراق وتی : " ئێمە رێگە بە هیچ رێككەوتنێكی سیاسی لەنێوان هەرێم و بەغدا نادەین و رازی نابین لەژێر رێككەوتنی سیاسی رێگە بە گەرانەوەی هێزی پێشمەرگە بدرێت بۆ كەركوك".