مەسرور بارزانی پەیامێك بڵاو دەكاتەوە
سەرۆكی ئەنجومەنی وەزیرانی حكومەتی هەرێم پەیامێكی لەبارەی ناوچە كوردستانییەكانی دەرەوەی ئیدارەی هەرێم بڵاو كردەوە رایدەگەیەنێت بەداخەوە سیاسەتی بەعەرەبكردن و گۆڕینی دیمۆگرافی بەشێوەیەكی بەرنامە بۆداڕێژراو لەو ناوچانە بەردەوامە.
مەسرور بارزانی، سەرۆكی ئەنجومەنی وەزیران لەپەیامەكەیدا ڕایگەیاندوە"بەوپەڕی نیگەرانییەوە چاودێری بارودۆخی ناوچە كوردستانییەكانی دەرەوەی ئیدارەی هەرێمی كوردستان دەكەین، بەتایبەت لە سنووری پارێزگای كەركووك، كە بەداخەوە سیاسەتی بەعەرەبكردن و گۆڕینی دیمۆگرافی بەشێوەیەكی بەرنامە بۆداڕێژراو لەو ناوچانە بەردەوامە كە دووبارەكردنەوەی هەمان سیاسەتی بەعەرەبكردنی ڕژێمەكانی پێشووی عێراقە لە دژی خەڵكی ئەو ناوچانە. ئەوەی زیاتریش جێگەی نیگەرانی و سەرسوڕمانی ئێمەیە، ئەو كردەوانە لە عێراقێكی دیموكراتی ئەنجام دەدرێت، كە بەپێی دەستوور نەخشەڕێگە و چۆنیەتی ئاساییكردنەوەی بارودۆخی ناوچە كێشە لەسەرەكان و دیاریكردنی چێ‌رەنووسیان دیاریكراوە"
سەرۆكی ئەنجومەنی وەزیران راشیگەیاندوە"لەكاتێكدا كە بە تووندی ئیدانەی سیاسەتی بەعەرەبكردنی ناوچە كێشەلەسەرەكان و بە تایبەت لە كەركووك دەكەین، دووپاتیشی دەكەینەوە كە حكومەتی هەرێمی كوردستان هەرگیز ئەو جۆرە سیاسەتە قبوڵ ناكات، بە تایبەت گەڕاندنەوە و نیشتەجێكردنی خەڵكانێك كە دانیشتووی ڕەسەنی ئەو ناوچانە نین، ئەمە جیا لە داگیركردنەوەی گوند و ناوچە كوردستانییەكان و دەركردنی هاووڵاتییانی كورد و توركمان لەسەر خاكی خۆیان و داگیركردنەوەی زەوییە كشتوكاڵییەكانیان و جارێكی دیكە بەخشینی بەو كەسانەی كە 35 ساڵ لەژێر سایەی ڕژێمی پێشوو، زەوییەكانیان داگیركرد بوو. بۆ چارەسەركردنی ئەو بابەتانەش ، شاندێكی حكومەتی هەرێمی كوردستان راسپێردراوە سەردانی بەغدا بكات"
راشیگەیاندوە"داوا لە حكومەتی فیدڕاڵی دەكەین كە ڕێكاری پێویست بگرێتە بەر، بە پێی ئەو دەسەڵاتە دەستوورییانەی پێیدراوە، تا ڕێگری لە هەندێك لە ئیدارە خۆجێیەكان بكات، كە لە درێژەدان بەم جۆرە سیاسەتە بوەستن. هەروەك پێویستە بڕیاری دوورخستنەوەی هێزە سەربازییەكان بدات لە ئەنجامدانی ئەو جۆرە سیاسەتە و بەكارهێنانیان لەم پرۆسەیەدا. دووپاتیش لە داواكارییەكانمان دەكەینەوە بۆ ئاساییكردنەوەی بارودۆخی ئەو ناوچانە و جێبەجێكردنی ماددەی 140ی دەستوور. هەروەها داواش لە نێردەی تایبەتی نەتەوە یەكگرتووەكان لە عێراق دەكەین كە بەپەلە هەوڵی خۆی بدات بۆ ڕێگریكردن لەو پێشێلكارییە ترسناكانەی كە دەرهەق بە خەڵكی ڕەسەنی ئەو ناوچانە دەكرێت لە لایەن ئیدارە خۆجێیەكانەوە"
ئەوەشی خستوەتە روو" سەپاندنی ئەو جۆرە سیاسەت وڕەفتارانە، هەڕەشە لە ئاشتی كۆمەڵایەتی ئەو ناوچانە دەكات كە پێچەوانەی خواستی ئێمەیە بۆ پێكەوەژیانی ئاشتییانە و برایانەی نێوان هەموو پێكهاتەكان"
