ئەندامێكی لێژنەی دارایی پەرلەمانی كوردستان رایگەیاند، ئەگەر حكومەت بەداهاتی ئێستایەوە بیەوێت مووچە (30) ڕۆژ جارێك دابەش بكات ڕێژەی لێبڕینەكە زۆر بەرز دەبێتەوە لەو ڕێژەی لەمانگەكانی پێشوودا بڕدرا. 

(بەڵێن ئیسماعیل) لە چاوپێكەوتنێكیدا لەگەڵ دەنگی ئەمریكا وتویەتی، ئەو داهاتەی كەئێستا لەبەردەم حكومەتی هەرێمی كوردستاندایە بەو هەموو گەندەڵی و لادانەوە بێگومان بەشی تەواوی مووچەی مووچەخۆران ناكات و حكومەت ناتوانێت (30) ڕۆژ جارێك بەتەواوەتی مووچە دابین بكات.

سەبارەت بەوەی ئەگەر بڕیاری دابەشكردنی مووچە بەمانگانە بچێتە بواری جێبەجێكردنەوە ئەوا ڕێژەی لێبڕین لە (21%) زیاتر دەبێت، بەڵێن ئیسماعیل دەڵێت، ئەگەر بێینە سەر لێبڕینەكە بەڵێ بێگومان دەتوانێت، بەڵام ئایا ئەو لێبڕینە چەندەو چۆنە ئایا بەرزكردنەوەی ڕێژەی لێبڕینەكە ناچێتە سنورێك كەهەموومان بەحكومەتیشەوە پەشیمان ببین لەوەی كەبڵێین بەو جۆرە مووچە دابەش مەكە.

رونیشیكردەوە، لەبەرئەوەی ئێستا داهاتی مانگانە بەپێی ئەو سەرچاوانەی كە لەوەزارەتی دارایی دەستمان كەوتووە بەو هەموو كێشەو گەندەڵی و كەموكورتی و بەهەدەردانەی كەهەیە كە كۆدەكرێتەوە، خۆی دەدات لەنزیكەی (400 – 450) ملیۆن دۆلاری مانگانە كە ئەمە زۆر زۆر كەمترە لەو ڕێژەیەی كەپێویست دەكات بۆ مووچە. 

واتە ئەگەر حكومەت بەو داهاتەوە مەبەستی بێت ئەو داهاتەی كەئێستا لەبەردەستیدایە، 30 ڕۆژجارێك دابەش بكات بێگومان ڕێژەی لێبڕینەكە زۆر زۆر بەرز دەبێتەوە. 

(بەڵێن ئیسماعیل) دەشڵێت: لەبەرئەوەی داهاتی ناوخۆ جێگیر نییە بەشێكی زۆری پشتی بەنەوت بەستووە، نرخی نەوت ڕۆژانە لەبەرزبوونەوەو نزم بوونەوەدایە، داهاتی ناوخۆ وەكو ئاشكرایە بێجگە لەو قاچاخچێتی و گەندەڵیەی كە لە خاڵەسنورییەكان هەیە بێگومان دەستی حیزبەكان تائێستا بەتایبەتی پارتی و یەكێتی لەداهاتی ناوخۆ بەردەوامە، لەبەرئەوە ناتوانیین بڵێن بەوردی ئەوەندەیە، ئەوەی كەئێستا هەیە دەڵێن، بەنزیكی (400 – 450) ملیۆن دۆلارە، لەوانەیە مانگی داهاتوو بەرزبێتەوە بۆ (600) ملیۆن دۆلار یان لەوانەیە كەم بكات بۆ (300) ملیۆن. 

ئەوە لەكاتێكدایە، دوێنێ پێنج شەممە (دارا رەشید) وەزیری پلاندانانی هەرێم جەختیكردبوویەوە رێژەی تەمویلی مووچە لەو بڕە كەمتر نابێت كە لەمانگەكانی پێشوودا حكومەت دابینیكردووە كە (79%) بوو، بەوپێیەش لیبڕین (21%) بوو.