كوردیو

تەندروستی گەرمیان رێنمایی تایبەت بە دەرهێنانی كارتی ڤاكسین بڵاودەكاتەوە و ڕایدەگەیەنێت،"ئێستا ناسنامەی وەرگرتنی ڤاکسینی کۆرۆنا لە تەندروستی گەرمیان دروستدەکرێت بۆ ئەو کەسانەی کە پێویستیان پێیە بۆ گەشت و ڤیزا".

 

ئەمڕۆ پێنجشەممە 30-9-2021 بەرێوەبەرایەتی گشتی تەندروستی گەرمیان بڵاویكردووەتەوە،"ھاوڵاتیانی ئارەزومەند دەتوانن سەردانی ھۆبەی ئایتی بکەن لە دیوانی تەندروستی گەرمیان لەناو نەخۆشخانەی شەھید شێرەی نەقیب، لەوێ کارتی وەرگرتنی ڤاکسینەکە و کۆپیەکی پاسپۆرتەکەیان لێ وەردەگیرێ و ھەر لە ھەمان ژوور پسوڵەیان بۆ دەکرێت و رۆژی دواتر ناسنامەکەیان بۆ چاپ دەکرێت و پێیان دەدرێتەوە".

 

ئاماژە بەوەشدراوە،"بەنیسبەت ئەو ھاوڵاتیانەی کە پێشتر ڤاکسینیان وەرگرتوە و ناویان لە ئەپی (کوردڤاک) تۆمار نییە، پێش ھاتنیان بۆ ھۆبەی ئایتی، سەردانی ئەو مەڵبەندە بکەن کە ڤاکسینەکەیان لێی وەرگرتوە و لەوێ کارتی ڤاکسینەکەیان مۆر دەکرێتەوە بۆ دڵنیابوون لە درووستییان".

 

روونیشكراوەتەوە،"رۆژانی یەکشەمە تا پێنجشەمە، لەکاتژمێر 9ی بەیانی بۆ 1ی نیوەڕۆ، دەتوانن سەردانی ھۆبەی ئایتی بکەن بۆ دەرکردنی ئەو ناسنامەیە".