كوردیو 

 

وەزارەتی دارایی حكوومەتی كاربەرێكەری هەرێم ڕایدەگەیەنێت،"بانکی عێراقی بۆ بازرگانیی (TBI) بەشداری لە پڕۆژەی هەژماری من دەكات بۆ بە دیجیتاڵکردنی مووچەی مووچەخۆرانی هەرێمی کوردستان".

 

ئەمڕۆ چوارشەممە 8-5-2024 وەزارەتی دارایی حكوومەتی كاربەڕێكەری هەرێم بڵاویكردەوە،"نوێنەرانی حکومەتی هەرێمی کوردستان و تیمی (هەژماری من) لەم هەفتەیەدا، چەندین کۆبوونەوەیان لەگەڵ نوێنەرانی بانکی عێراقی بۆ بازرگانی ئەنجامدا".

 

ئاماژە بەوەش دراوە،"لە کۆبوونەوەکاندا، گفتوگۆ لەبارەی میکانیزم و پێداویستییەکانی کردنەوەی هەژمارەکان و پرۆسەی دروستکردنی کارت و بڵاوکردنەوەی ئامێرەکانی ATM لە سەرانسەری هەرێمدا کرا".

 

باس لەوەش كراوە،"بانکی عێراقی بۆ بازرگانی (TBI) هاوتا لەگەڵ شەش بانکی دیکەی پێشەنگی عێراق، بژاردەیەکی فراوانتری بەرهەم و خزمەتگوزاریی بانکی بە هاووڵاتییان دەبەخشێت، ئەمەش هەواڵێکی دڵخۆشکەرە بۆ مووچەخۆرانی کەرتی گشتی لە هەرێمی کوردستان و کەرتی دارایی عێراق".