پلاتفۆرما یوتیوبى بڕیارهكا نوى دا و ل گۆرهى وێ ئهو لینكێن بهلاڤكهرێن ڤیدیۆیان و شورت ڤیدیۆیان Shorts د دێسكرێپشنێن ڤیدیۆیێن خۆ و د كۆمێنتێن Shorts دا ددانن ئێدى ناڤهبن و ناهێنه كلیككرن.
یوتیوب د چارچووڤهیێ گوهۆڕینێن خۆ یێن ئهمنى دا، بڕیارا رێگریێ ل كلیككرن و ڤهبوونا لینكان د دێسكرێپشنێن ڤیدیۆیان و كۆمێنتێن ل سهر ڤیدیۆیێن كورت Shorts دا ددهت زێدهبارى رێگریێ ل بهلاڤكرنا خۆدانێن ڤیدیۆیان بۆ ئهكاونتێن خۆ یێن د پلاتۆرمێن دى یێن سوشیال میدیایێ دا د دێسكرێپشنێن ڤیدیۆیێن یوتیوبى دا.
د نوكه دا، بهلاڤكهرێن ڤیدیۆیان و ب تایبهت ئهگهر ئهو ڤیدیۆیه ژ ژمارهیهكا خهلهكان پێكبهێت یان ژى پێدڤى ب هندهك زانیاریێن دى بیت، گهلهك جاران لینكهكێ دى د دێسكرێپشنا ڤیدیۆیێ دا ددانن، لێ ههر ژ دهستپێكا ههیڤا بهێت ئهڤ چهند نامینیت.
یوتیوبى ل دۆر ڤێ بڕیارێ دیاركریه؛ ئهڤ بڕیاره ههر ژ 31/8/2023 دێ كهڤیته د وارێ بجهئینانێ دا و ئارمانج ژێ رێگریه ل ئاراستهكرنا بكارهینهران بهرهڤ لینكێن نهئێمن و پاراستنا وانه ژ فێلبازیان.
خۆیا ژى كریه؛ لینكێن د كۆمێنتێن ل سهر ڤیدیۆیێن Shorts دا، لینكێن د دێسكرێپشنێن ڤیدیۆیان دا ههروهسا یێن د لایڤان دا، د شیان دا نابیت كلیك ل سهر بهێته كرن.
ئاماژه ب وێ چهندێ ژى كریه كو ب تنێ د حالهتهكێ دا دێ رێك ب كلیككرنا لینكان هێته دان، ئهو ژى ئهگهر لینك یێ ڤیدیۆیهكا درێژ بیت كو گرێداى وێ ڤیدیۆیا كورت بیت ئهوا هاتیه بهلاڤكرن.