ئێكه‌تیا ته‌پاپێى یا نێڤده‌وله‌تى FIFA رێزبه‌ندیا هه‌لبژارتیان بۆ هه‌یڤا شوباتێ به‌لاڤكر و تێدا هه‌لبژارتیێ عیراقێ ب چار رێزان پێشڤه‌ هات و گه‌هشته‌ رێزا 59 ل سه‌ر ئاستێ جیهانێ.

ل گۆره‌ى رێزبه‌ندیا هه‌یڤانه‌ یا فیفایێ بۆ هه‌یڤا شوباتێ كو ئه‌ڤرۆ پێنجشه‌مبیێ هاتیه‌ به‌لاڤكرن، هه‌لبژارتیێ عیراقێ ل رێزا 59 ل سه‌ر ئاستێ جیهانێ و ل رێزا حه‌فتێ ل سه‌ر ئاستێ كیشوه‌رێ ئاسیا ب سه‌رجه‌مێ 1409.44 خالان هات.

ل سه‌ر ئاستێ ئاسیا، ژاپۆن ل رێزا ئێكێ، ئیران ل رێزا دووێ، كۆریا باشوور ل رێزا سیێ، ئوسترالیا ل رێزا چارێ، قه‌ته‌ر ل رێزا پێنجێ و سعوودیه‌ ل رێزا شه‌شێ هاتن.

هه‌لبژارتیێ عیراقێ د جاما ئاسیا یا بۆرى دا ل قه‌ته‌رێ سێ سه‌ركه‌فتن د قووناغا كۆمان دا تۆماركربوون و ل قووناغا 16ێ یا قاره‌مانیێ تووشى دۆڕاندنێ ببوو به‌رانبه‌ر ئوردنێ و قاره‌مانى ب جهـ هێلابوو.