وەزیری كۆچ و كۆچبەرانی عێراق ڕایدەگەیەنێت: لەماوەی یەك مانگدا نزیكەی ٢٥ هەزار ئاوارەی عێراقی گەڕاونەتەوە ناوچەكانیان و پرۆسەكەش بەردەوامە.
بە گوێرەی هەواڵی بەشێك لە میدیا عێراقیەكان، ئیڤان فایەق وەزیری كۆچ و كۆچبەرانی عێراق ڕاگەیاند: بە شێوەی ئارەزوومەندانە تەنها لە ماوەی یەك مانگدا پێنج هەزار و ١٨٠ خێزان كە لە ٢٥ هەزار ئاوارە پێكهاتبوون گەڕاونەتەوە ناوچەكانی خۆیان.
هەروەها ئەوەشی خستەڕوو: تاوەكو ئێستا ١٥ كەمپ داخراون و گەڕانەوەی ئەو ئاوارانە دوای دەستەبەركردنی سەقامگیری بووە بۆ گەڕانەوەیان بۆ ناوچەكانی خۆیان و لە ئێستادا تەنها شەش كەمپ ماونەتەوە كە نزیكەی حەوت هەزار و ٦٩٦ خێزان لە پارێزگاكانی نەینەوا، كەركووك، دیالە و ئەنبار لەخۆدەگرێت.