کوردیو

كوڕێ مامۆستا بەدەل بەرواری رەت دكەت بابێ وى ل ئاسایشا هەولێر گیانێ خۆ ژ دەست دا بیت و راگەهاند: ئەو دەنگ وباسێن ل سەر وێ چەندێ هاتینە بەلاڤ كرن چ راستی بۆ نینە و پارێزەرێ وی ژی دبێژیت: ئەم چ ژێ نزانین.

د داخویانییەکێ دا ئاری بەدەل بەرواری كوڕێ چالاكڤانێ مەدەنی مامۆستا بەدەل بەرواری ئەو گۆتگۆتك رەت كرن یێن دبێژن كو بابێ ل بن ئەشكەنجەدانێ گیانێ خۆ ژ دەستدایە.

ئاری دبێژیت: ئەو گۆتكۆتكێن د تۆڕێن جڤاكی دا ل سەر وێ چەندێ هاتینە بەلاڤ كرن بۆ مە جهێ حێبەتیبوونێ بوون، ژ بەركو مە دزانی دویرن ژ راستیێ و چ بنەما بۆ نینن.

ژ لایێ خۆڤە رێڤینگ یاسین پارێزەرێ بەدەل بەرواری د پەیڤەكا رۆژنامەڤانی دا راگەهاند: مە چ زانیاری ل سەر ژیانا وان ززیندانییان نینن و ژ وێ رۆژا هاتینە گرتن رێ نەهاتییە دان ژ نێزیك ببینین و چ زانیاری ب مە نەهاتینە دان.

هەروەكی دهێتە زانین، ماوێ چەند هەیڤەكایە هژمارەكا چالاكڤانێن دەڤەرا بادینان هاتینە گرتن كو ئێك ژ وان مامۆستا بەدەل بەروارییە كو ب گونەهبارییا ئنیەتئینانا ئەنجامدانا خۆنیشاندانەكێ هاتبوو گرتن.