نوشدارەکێ بسپۆر جوداهیا د ناڤبەرا تووشبوونێ ب کۆرۆنایێ و هەروەسا تووشبوونێ ب پەرسیڤێ دیار کر و دا زانین: نوکە وەرزێ پەرسیڤێ نینە.

دکتۆر زانا دزەیی دیار کر: دەمێ تایەکا دژوار دهێتە کەسەکی و کوخکەکا هشک هەبیت و هەروەسا ل دەمێ ئاخفتنێ بێهنا وی تەنگ ببیت و سەرئێشان و هەروەسا ئێشانا زەڤلەکان هەبیت و زکێ وی بچیت و هەست ب وەستیانێ بکەت و هەستێن تامکرن و بێهنکرنێ لاواز ببن، ئەو نیشانێن کۆرۆنایا ژ جۆرێ دەلتا نە.

هەروەسا خۆیا کریە: ئەگەر کەسەک هەست بکەت گەوریا وی تەنگ بوویە و دفنا وی بهێتە گرتن و ئاڤ ژ دفنا وی بهێت و هەروەسا تایەکا سڤک و سەرئێشانەکا سڤک هەبیت و بێهنژین و کێمبوونا هەستا بێهنکرنێ و وەستیانەکا کێم هەبن، ئەڤە نیشانێن پەرسیڤ ئانکو ئەنفلەوەنزا نۆرمالن و پێدڤی ناکەت ژ کۆرۆنایێ بترسیت.