كوردیو

 

پارێزگاری هەولێر لە یادی كیمیابارانكردنی هەڵەبجەدا ڕایدەگەیەنێت،"دەبێت حکومەتی عێراق قوربانیانی ئەم كارەساتە قەرەبوو بكاتەوە".

 

 

ئومێد خۆشناو پارێزگاری هەولێر پەیامێكی بەبۆنەی (36)مین ساڵیادی کیمیابارانکردنی هەڵەبجە بڵاوكردووەتەوە و تێیدا هاتووە،"ئەمڕۆ 16ی ئازاری 2024، (36 ساڵ) بەسەر كارەساتی كیمیابارانكردنی هەڵەبجە لەلایەن ڕژێمی لە ناوچووی بەعس تێدەپەڕێت، كە لە ئەنجامیدا (5 هەزار) هاوڵاتی سڤیلی شارەكە شەهید بوون و چەندانی تریش بریندار بوون".

 

ئاماژەی بەوەشداوە،"ئەو تاوانەی بەعس کە درێژكراوەی زنجیرەی ئەو تاوانانەبوو دەرهەق بە گەلەكەمان ئەنجامیدا بە ئامانجی نەهێڵان و سڕینەوەی نەتەوەکەمان، تاوانێكی هێندە گەورە و دڕندانەبوو، هەرگیز لە بیری هیچ کوردستانییەک ناچێتەوە".

 

ئەوەشی خستووەتەڕوو،"لەو یادەدا کە لە نێو یادەوەریی نەتەوەیی و نیشتمانیماندا بەئازارترینیانە، وێڕای ئەوەی سەری ڕێز و نەوازش بۆ شەهیدان و قوربانیانی دادەنەوێنین، جەخت لەوەدەکەینەوە کە دەبێت حکومەتی عێراق قوربانیانی ئەم كارەساتە قەرەبوو بكاتەوە و چارەسەری پێویست بۆ بریندارانی بگرێتە ئەستۆی و بەفەرمیش داوای لێبوردن لە گەلی کوردستان بکات".