سەرۆکوەزیرێن عیراقێ ب سەرەدانەکا فەرمی ل ئەمریکا یە و دێ چەندین پرسێن گرێدایی پەیوەندییێن هەردو وەلاتان و رەوشا رۆژهەلاتا ناڤین ل گەل سەرۆکێ وی وەلاتی گۆتوبێژ کەت.
محەمەد شیاع سوودانی، سەرۆکوەزیرێن عیراقێ ب سەرەدانەکا فەرمی ل ئەمریکا یە و ل وی وەلاتی دێ ل گەل جۆ بایدن، سەرۆکێ ئەمریکا کۆم بیت. بەری سەرەدانێ و کۆمبوونێ، کارنامەیا کۆمبوونا ل گەل سەرۆکێ ئەمریکا هاتییە راگەهاندن و دێ بابەتێن گرێدایی پەیوەندییێن ئابۆری و شەڕێ ل دژی تیرۆرێ و رەوشا رۆژهەلاتا ناڤین ب گشتی، د ناڤبەرا وی و سەرۆکێ ئەمریکا دا هێنە بەحسکرن.
سوودانی بەری سەرەدانێ بۆ کوڤارا فۆرن ئەفەیرس گۆت بوو: پەیوەندییێن عیراقێ و ئەمریکا کلیلا چارەسەرییا کێشەیێن رۆژهەلاتا ناڤینن، ئەمریکا د ژناڤبرنا رژێما بەعس دا هاریکارییا عیراقێ کرییە، هەروەسا عیراق ب هاریکارییا ئەمریکا و هەڤپەیمانان شیا مەزنترین رێکخستنا تیرۆری ژناڤ ببەت، لەورا عیراق خۆ ناکەتە پشکەک ژ کێشەیێن د ناڤبەرا ئەمریکا و ئیرانێ دا.