رۆژنامه‌یه‌كێ ئاشكرا كریه‌ كو یانه‌یا ئیتیحاد جه‌دده‌ یا سعوودى یا به‌رهه‌ڤه‌ 235 ملیۆن یۆرۆیان بۆ كڕینا محه‌مه‌د سه‌لاح هێرشبه‌رێ مسرى و ستێرا لیڤه‌رپۆل ته‌رخان بكه‌ت و ئه‌گه‌ر ئه‌ڤ چه‌نده‌ رویبده‌ت دێ بیته‌ گڕانترین هه‌ڤبه‌ستا ڤه‌گوهاستنا یاریكه‌ره‌كى د دیرۆكا ته‌پاپێى دا.

رۆژنامه‌یا زه‌ ئه‌تله‌تیك به‌لاڤكریه‌ "یانه‌یا ئیتیحاد پلان دانایه‌ ئۆفه‌ره‌كا پیڤانكى ژ بۆ ڤه‌گوهاستنا محه‌مه‌د سه‌لاحى پێشكێشى لیڤه‌رپۆل بكه‌ت".

ديار ژى كریه‌ "ئیتیحاد یا به‌رهه‌ڤه‌ ئۆفه‌ره‌كا دارایى یا زه‌به‌لاح ب بهایێ 235 ملیۆن یۆرۆیان بۆ رازیكرنا لیڤه‌رپۆل ل سه‌ر ده‌ستبه‌ردانێ ژ محه‌مه‌د سه‌لاحى پێشكێشبكه‌ت".

ئه‌گه‌ر لیڤه‌رپۆل ل سه‌ر ڤێ هه‌ڤبه‌ستێ رازیبوو، دێ بیته‌ گڕانترین هه‌ڤبه‌ستا ڤه‌گوهاستنا یاریكه‌ره‌كى د دیرۆكا ته‌پاپێى دا كو تا نوكه‌ كۆژمه‌یێ 222 ملیۆن یۆرۆیێن پاریس سان جێرمان بۆ كڕینا نه‌یمارى ژ به‌رشلۆنا ل سالا 2017 پێشكێشكری گڕانترین هه‌ڤبه‌ست بوو.

هه‌ڤبه‌ستا محه‌مه‌د سه‌لاحى تا هاڤینا سالا 2025 ل گه‌ل لیڤه‌رپۆل به‌رده‌وامه‌ و ل گۆره‌ى راپۆرتان یانه‌ بزاڤێن نویكرنا هه‌ڤبه‌ستێ دكه‌ت.