سەقاناسیا هەرێمێ راگەهاند، ژبلی پارێزگەها سلێمانیێ برا باران بارینێ د ئەڤسالە دا ل هەمی پارێزگەهێن دی هەڤبەر ب سالا دەربازبووی زێدە بوویە.

ئەڤرۆ ئێکشەمبی، رێڤەبەریا سەقاناسی و عەردهەژزانا هەرێمێ ئامارا باران بارینا پارێزگەهان د هەیاما ئەڤسالە دا بەلاڤکر و ئاماژە ب وێ یەکێ کر، ل پارێزگەها دهۆکێ زۆرترین برا باران بارینێ کو زێدەتری ٨٢٣ ملم بوینە و ل پارێزگەها کەرکوکێ کێمترین برا باران بارینێ بوویە کو ٣٤٦.٤ ملم بووینە.

ئەو ژی بەرچاڤکر، د ئەڤسالە دا زۆرترین باران بارین ل پارێزگەها دهۆکێ بوویە کو ٨٢٣.٣ ملم بووینە و هەڤبەر ب سالا دەربازبووی کو بتنێ ٣٨٨ ملیمێن بارانێ بارینە، ئەڤسالە ٤٣٤.٩ ملم زێدە بووینە.

گوت ژی، د هەیاما ئەڤسالە دا ل پارێزگەها هەولێرێ ٥٨٤.٢ ملم باران باریە و هەڤبەر ب سالا دەربازبووی کو ٢٥١.٩ ملم بوون، ٣٣٢ ملیمان باران زێدەتر باریە.

هه‌روه‌سا ل پارێزگەها سلێمانیێ ب تێکرا ئەڤسالە ٦٧٢ ملم باران باریە و هەڤبەر ب سالا دەربازبووی ٦٠ ملم کێم بووینە، ژبەرکو سالا دەربازبووی برا باران بارینێ ل وێ پارێزگەهێ ٧٣٢.٨ ملم بووینە.