ئەمڕۆ پێنج شەممە بەشێك لە جوتیاران لەبەردەم بینای وەزارەتی كشتوكاڵ لە هەولێر گردبونەوەو وەزیری كشتوكاڵ و سەرچاوەكانی ئاوی حكومەتی هەرێمی كوردستان ڕایدەگەیەنێت: خۆپیشاندانەكەی ئەمڕۆی جوتیاران سیاسی بوو.

سەرلەبەیانی ئەمڕۆ پێنج شەممە 24-9-2020، ژمارەیەك لە جوتیاران چونە بەردەم بینای وەزارەتی كشتوكاڵ و سەرچاوەكانی ئاوی حكومەتی هەرێمی كوردستان و دژی هاوردەكردنی پەتاتە گردبونەوەو ڕایانگەیاند: بەهۆی هاوردەكردنی پەتاتەی ئێرانییەوە بەرهەمەكانی ئەوان ساغ نابێتەوە.

لەسەر ئەو پرسە، بێگەرد تاڵەبانی وەزیری كشتوكاڵ و سەرچاوەكانی ئاوی حكومەتی هەرێمی كوردستان بە ڕۆژنامەنوسانی ڕاگەیاند: دیارە ئەو بابەتەش بەسیاسی كراوەو جوتیاران هاندراون بێنە بەردەم وەزارەتی كشتوكاڵ و ئەو قسانەی ئەو جوتیارانە دەیان كرد پەیوەندی بەداواكارییەكانیانەوە نەبوو.

هەروەها وەزیری كشتوكاڵ و سەرچاوەكانی ئاوی حكومەتی هەرێمی كوردستان داواشی لە جوتیاران كرد بچنە بەردەم داواكاری گشتی و وەزارەتی ناوخۆ و دارایی و ووتی: مەرزەكان لەژێر فەرمانی ئەواندایە بۆیە داواكارییەكانتان بەوان بگەیەنن.