قایمقامێ دهۆكێ: كه‌سێن پێگیریێ ب رێنمایێن ساخله‌میێ نه‌كه‌ن دهێنه سزادان
كورديو
قایمقامێ قه‌زا دهۆكێ دیاركركو هه‌كه هژمارا تووشبوویێن كۆرۆنایێ كێم ژی بیت رامانا وێ ئه‌و نینه مه‌ترسیا كۆرۆنایێ نینه به‌لكو مه‌ترسیا كۆرۆنایێ گه‌له‌ك هه‌یه.
جه‌هوه‌ر عه‌لی عه‌زیز، قایمقامێ قه‌زا دهۆكێ دیاركركو هه‌ر خرڤه‌بوونه‌ك وتێكه‌لیه‌ك هه‌بیت پێدڤیه ل دووڤ رێنمایێن ته‌ندروستی بیت و خه‌لكێ خوه ژی دوور بكه‌ین و تێكه‌لیێ نه‌كه‌ن بۆ وێ چه‌ندێ پتر كونترول ل سه‌ر په‌تایا كۆرۆنایێ ل دهۆكێ بهێته كرن مه نه‌ڤێت خه‌لكێ خوه سزابده‌ین مه‌ره‌ما مه ئه‌وه نه‌خۆشی بهێته كونترولكرن و خه‌لك تووشی ڤێ نه‌خۆشیی نه‌بن.
ئاشكه‌را كركو به‌رده‌وام بۆ بجهئینانا رێكار و رێنمایێن خۆپاراستنا ساخله‌میێ بۆ به‌رهنگاریا كۆرۆنایێ نه‌خاسمه دڤێ وه‌رزێ دا مه‌ترسی هه‌یه نه‌خۆشی پتر به‌لاڤ ببیت لیژنێن دوڤچوونێ قه‌ستا بازاری دكه‌ن له‌ورا یا فه‌ره وه‌لاتیێ دبه‌رده‌وام بن ل سه‌ر خۆ پاراستنی.
قایمقامێ دهۆكێ گۆت: بكارئینانا ماسكێ باشترین رێكه بۆ به‌رهه‌نگاریا كۆرۆنایێ ونه‌هێلانا به‌لاڤبوونا ڤێ په‌تایێ دناڤ وه‌لاتیان دا ئه‌م هێڤدارێن وه‌لاتیێ به‌رده‌وام بن ل سه‌ر بكارئێنانا ماسكا وهه‌موو رێنمایێن ته‌ندروستی بۆ به‌رهه‌نگاریا كۆرۆنایێ.
ناڤهاتی ئه‌وژی خۆیا كركو رۆژانا ئه‌و كه‌سێن نه پێگیر ب رێنمایێن ته‌ندروستی دهێنه سزادان ئه‌ڤرۆ ژی خه‌لك هاتینه سزادان كو 50 كه‌س سه‌را بكارنه‌ئینانا ماسكێ یێن هاتینه سزادان هه‌تا 12 جه ژی یێن هاتینه دائێخستن هه‌تا 80 جه ژی یێن هاتینه سزادان دگه‌ل سزادانا چه‌ندین ترۆمبێلان ژبه‌ر بجهنه‌ئینانا رێنمایێن ساخله‌می بۆ به‌رهنگاریا كۆرۆنایێ.
