وەك بڕیاربوو ئەمڕۆ دووشەممە لەشاری سلێمانی خۆپیشاندانی مامۆستایان دەستیپێكردو لەلایەن هێزە ئەمنیەكانەوە ڕێگەنەدرا خۆپیشاندەران بەرەو دەباشان بڕۆن و چەندین مامۆستاش دەستگیركرا.
لەو بارەیەوە، هەڵاڵە محمد ئەڵماس ئەندامی دەستە باڵای چاودێری یەكگرتووی ئیسلامیی كوردستان و چالاكوان بڵاویكردەوە: بەداخەوە جارێكی دیكە دەسەڵات لەبری گوێگرتن و جێبەجێكردنی داواكاری مامۆستایان و فەرمانبەران و كەمكردنەوەی ئەركی قورسی سەرشانیان، دەستی برد بۆ توندوتیژی و چەندین مامۆستای دەستگیركرد لەكاتێكدا كە مامۆستایان داوای مافە ڕەواكانی خۆیان دەكەن.
وتیشی: پشتیوانی لەخواست و داواكاری ڕەوای مامۆستایان دەكەین بۆ بەنیشتیمانیكردنی مووچەو جێبەجێكردنی سەرجەم داواكارییە ڕەواكانی مامۆستایان و مووچەخۆران و پێویستە حكومەتی كاربەڕێكەری هەرێمی كوردستان لەزووترین كاتدا دەست بەدابەشكردنی مووچە بكات و چیتر یاری بەقوتی مووچەخۆرانی هەرێم نەكات.