جاسم محمد شرنەخی

هەر ل دەستپیێکی من دڤێت ئەز ئاماژێ بوێ چەندێ بدەم، كو ئەز پەیڤێت خوە ئاراستەى وان دل مریان ناکم یێت ب مال و داهاتێ ڤى مللەتى دەولەمەند بووین و وەکى نەهەنگێن ئۆقویانوسا دداعویرن و ب شەڤ و رۆژ لێ ددن و پاریێ دەڤێن ئیتیم و پەکەفتیا دڕەڤینن و دخۆن، ئەو بێ وژدانێت نابێژنە خوە، كو فەرمانبەرێ مۆچەیێ وى و زاڕۆکێت وى 400-500 هزار دینار و دەمێ دهێتە بڕین و خوارن، ئەو هەژارە چەوا دژین، چ دخۆن و چەوا ل ڤێ سڕوسەقەمێ بێ سۆتەمەنى ل وەڵاتێ دەریا سۆتەمەنیێ جان و جەستیێ خوە دپارێزن، ئەز بۆ ڤان دڕەندەیێت خایین نا ئاخڤم؟!

بڕاستى ئاخفتن یا زێدەیە بۆ کەسێن ئەگەر دندکا مرۆڤایەتیێ هەبان، نە دکارین ڤێ دلڕەقیێ هەتا لگەل دوژمنێن خوەژى بکن.

نەزانەک یانژى کوڵەیەک نەبت باش دزانت چاکبوونا ڤان جۆرە بێ بەختا چ ڕێ ناچنێ و ئەستەمە، چونکى هیچ جارەکێ دیرۆکا مرۆڤاتیێ چ یا کەڤن یانژى یا نوى، ڕویدانەکا تەوبەکرنا گەندەڵچیێن زالم تۆمار نەکریە، لەورا ئەم وەسا بێ هیڤیینە نە کو تەنها ژ چاکسازیا وان، بەلکى هەتا ژ چاکبوونا وان ژى، کا چەوا مرۆڤ یێ بێ هیڤیە ل دونیایێ مریێن وان ئەڤێن هەستیێن وان ڕزین و بووینە ئاخ ژ گوڕێن خوە دەربکەڤن و دیسان بهێن نانێ ساخان بخۆن!

گەشبینی ب چاکسازیا زاڵمێن گەندەڵکار، هزرەکا بێ بناغەیە وەکى هیڤى و ئومێدێن وى گەنجییە یێ دوعا کوڕەکێ چاک بۆ خوە ژ خۆدێ کرى، لێ دهەمان دەمدا یێ رژدبوو ژنێ نە هینت!! کا ئەڤ کەسە چەند بێ ئەقلە، ئەها یێ ئومێدێن خوە دهەلاویست، کو تاڵانکەرێن ماڵێ گشتى دێ رۆژەکێ ل خوە زڤڕینەکا دروست کەن، ئانکو دێ ڕاوەستن ژ داعویرانێ و دێ وان ملیارەها دولارێن چاپکرین و سەدەها ملیون برمیلێن گازێ یێن دزین، ڤەگریننە ڤە و دێ بنە شەریفێت جیهانێ، ئەڤ کەسێ ئەڤە هزرا وى بیت، پێش منڤە باى بایا ل ئەقلێ وى بکن!

ل شوونا ڤێ خەونا خاڤ و بێ ڕامان، دەمێ ل هیڤیا چاکسازى یانژى هەتا چاکبوونا نەهەنگێن گەندەڵیی بمینین، ئەوا هیچ مفایەک تێدا نە، بلا هەمى چاڤڕوهن و هزر ڕەوشەن و خڕ دلسۆزێت ڤى وەڵاتى بەرێ خوە بدن رێکەکا دیتر یا چارەسەریێ، ئەوژى ب ئاڤاکرنا مرۆڤى کورد یان ئەگەر هویرتر و دروستر بێژین: ب رێکا سەر ژنوى ئاڤاکرنا کەسایەتیا کەسێ کورد بکین، ئاڤاکرن و پەروەردەکرنا خوە و بەرەبابێن نها ژ گەنج و زاڕۆکان ل سەر چەپەڵ دیتنا کریارا گەندەڵیێ، وەکو ڕەفتارەکا شەرەفسزیێ، مینا فیقهـ و فەلسەفا یاسایا عیراقى تەماشەى گەندەڵیێ کرى، وەکى هەمى دەما پیڤەرێ شەرەفێ ب دەستپاکى و دویریا ژ گەندەڵیێڤە گرێداى و هەر ئەو کریە مەرجێ سەرەکى ژ بۆ بەشداریکرنا ژیانا گشتی و وەرگرتنا پۆستێن فەرمى و ئیدارى.

هەر تەنها بۆ نموونە، دا پێکڤە بەرێ خوە بدین یاسا خزمەتگوزاریا سڤیل ژمارە (24) یا سالا یا ساڵا1960ێ، کا دڤى بیاڤیدا چ دبێژیت، دەقێ وى ب عەرەبى ئەڤەیە: ( لا يُعيَّنُ في الوظائف الحكومية الا من كان .. 4ــ حسن الاخلاق و غير محكوم عليه بجناية غير سياسية او بجنحة تمس الشرف كالسرقة والاختلاس والتزوير والاحتيال.. واتە: ل پۆستێن فەرمى – حکومى – کەسەک ناهێتە وەرگرتن، ئەگەر خوەدى ڕەوشتەکێ چاک نەبیت و ناهێت قەبوولکرن، ئەگەر ب تاوانەکێ یانژى هەتا بکەفتنەکا –نە سياسى- یا ژ شەرەڤێ بخۆت وەکى دزى و چەپکرنا مالێ گشتى و سەختەکارى و فێلبازیێ مەحکووم بیت).

مەرەما من پێ ئەو نینە ب یاسادانانێ دێ سەرکەفتن ل سەر گەندەڵى و مافیایێن گەندەڵگارێن کورد ب ئەنجام هێت، نەخێر مەرەم ئەوە ئەم ل سەر ڕەتکرنا ئێکجارى یا گەندەڵیێ پەروەرەدا خوە بکین و ڤێ تاوانێ وەکو کریارەکا بێ شەڕەفیێ ببینین، مینا بەهرا پترا جڤاکێن ئینسانى ل سەرانسەرى جیهانێ دبینن و خوە و زاروکێن خوە د خێزانێدا و ل دەرڤەى خێزانێ ل سەر بهایێت پیرۆزێت پاکى و چاکى و دستپاکیێ سەر ژنوى ئاڤا بکین.

گەندەڵیێ وەکو تاوانەکا دژێ خودێ ببینن و باوەریا ئایندارى و هێزا رۆحى فاکتەرێن هەرە کارلێکەرن دڤێ جەنگێدا.