هەرچەندە ل دەمێن بۆری چەندین جاران کۆمپانیا هواوی ب سیخۆریێ هاتیە سووچبارکرن، لێ ڤێ جارێ وەلاتەکێ ئەورۆپی ب سیخۆریێ ل سەر هێلەکا تێلەفۆنێ یا کۆمپانیەکێ سووچبار کر.

رۆژنامەیا دی فۆلکسکرانت یا هۆلەندی د راپۆرتەکێ دا بەلاڤ کر: ل دەمێ بۆری کۆمپانیا هواوی د شیا بگەهیتە هێلێن کۆمپانیا KPN و شیایە سیخۆریێ ل سەر تێلەفۆنێن گەلەک کەسایەتی و جهێن هەستیار بکەت.

دیار ژی کر: ژ وان تێلەفۆنێن کۆمپانیا هواوی سیخۆری ل سەر کری، جان پیتەر بالکینیدی سەرۆکوەزیرێ وی دەمی یێ هۆلەندا و گەلەک ژ وەزیرێن کابینەیا وی و زێدەباری سازیێن پۆلیس و هەوالگیریا هۆلەندی.

ئەڤە د دەمەکی دایە کۆمپانیا KPN ل سالا ٢٠٠٩ێ تەکنیکا هواوی بکاردئینا و وی دەمی کۆمپانیا ناڤهاتی ٦ ملیۆن و ٥٠٠ هزار پشکدار هەبوون.