كوردیو

 

وەزیری كارەبای هەرێم ڕایدەگەیەنێت،"سوودەکانی پێدانی کارەبا بە کەرتی تایبەت ئەوەیە کە ئەو کارەبایەی ون دەبێت دەگەڕێتەوە و بۆ ھاووڵاتییان دەبێت و کاتژمێرەکانی پێدانی کارەبا زیاد دەبێت".

 

کەمال محمدساڵح وەزیری کارەبای هەرێم ڕایگەیاندووە،" لە %70 ی کارمەندانی کەرتی تایبەتی کارەبا لە کارمەندانی کەرتی گشتی کارەبا دەبن و مووچەکەشیان کەرتی تایبەت دەیدات".

 

ئاماژەی بەوەشداوە،"سەرکەوتنی پێدانی کارەبا بە کەرتی تایبەت لە پێوەری زیرەک دایە. پێشتر لە بۆردی ماڵان سەرپێچی دەکرا و ئێستا زەحمەتە سەرپێچی لە پێوەری زیرەک بکرێت. تا ئێستا زیاتر لە ٨٢٧ ھەزار پێوەری زیرەک بەستراون".

 

ئەوەشی خستووەتەڕوو،" لە رۆژی 15 ی حوزەیران، پێنج یەکەی بەرهەمهێنانی کارەبا بە هۆی پرۆسەی چاککردنەوە (صيانه) لە کار کەوتن و بڕی پێدانی کارەبا کەمتر بووە، سەرۆکی حکومەت 40 ملیۆن دۆلاری بۆ خەرج کرد و دوو یەکە گەڕانەوە و ئەم رۆژانەش سێیەم یەکە دەگەڕێتەوە و دۆخی کارەبا باشتر دەبێت".

 

وتوشیەتی،" ئێستا ڕۆژانە 16 کاتژمێر کارەبا دەدرێتە هاووڵاتیان و پلان ھەیە زیاتر بکرێت و ھەر ئەم هەفتەیە کاتژمێرێک زیاد کراوە".