لە پەراوێزی کۆڕێکی یەکێتی نوسەراندا
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

لە پەراوێزی کۆڕێکی یەکێتی نوسەراندا

 
ئەگەر میرنشینیەکەی پاشای گەورە ،بە فەتوایەک ڕوخابێ ، هەرشیاوی ڕوخان بووە
 
لە کۆڕێکی لقی هەولێری یەکێتی نوسەرانی کورددا بۆ نوسەر (ئارێز عەبدوڵا) کەتیایدا کتێبێکی نوێی خۆی کە ڕۆمانێکی مێژوییە بەناوی ( پاشای گەورە) ناساند و کردە دیاری بۆ ئامادەبوان ، نوسەر ئاماژەی بەچەند خاڵێک کرد سەبارەت بەمیرنشینی سۆران ، لەوانە وتی میرنشینیەکە دەوڵەت بوو نەک میرنشینی و جوگرافیایەکی فراوان و گەورەتری هەبووە لەوەی کە خەڵک تێگەیشتوە .. وتی : قەڵەمڕەوی ئەو (دەوڵەت) ە لەدوکانەوە بۆ دیابەکرو ماردین بووەو لایەنی ئاسایشی ناوخۆیی میرنشینیەکە ، زۆر تۆکمە بووە..
هەروەها ڕەتیکردەوە کەپاشای گەورە نەک ( پاشا کۆرە) ، کەسێکی ستەمکارو توندڕەوو پیاوکوژ بووبێ ،بەڵکو ئەو بەکەسێکی لێبوردە وێنای کردو، لەباسی قەتڵوعامی یەزیدیەکاندا ،ئەگەرچی بەیەکجاری ئەو پرسەی ڕەت نەکردەوە ، بەڵام نەشی سەلماند..
 
سەبارەت بەوەی کە مێژونوس (حوسەین حوزنی موکریانی) وتویەتی لەئەنجامی فەتوایەکی (مەلای خەتێ) دا کەگوایە وتویەتی جەنگ لەگەڵ دەوڵەتی عوسمانیدا حەرامە ، بۆیە سوپاکەی میرنشینی سۆران بەرگری نەکردوە و پاشای گەورەبڕیاری خۆبەدەستەوەدانی داوە، نوسەر وتی:-
ئەوە قسەیەکی بێ بنامەیە ، چونکە ڕاستە پاشا موسڵمان بووە ، بەڵام دەوڵەتەکەی ئیسلامی نەبووە ، تاکو بەفەتوای مەلای خەتێ کاربکات ، هەروەها وتی پاشای گەورە لەوە گەورەتر بووە کەئەو کارەبکات. لەهەمانکاتدا ،نوسەری پاشای گەورە جەختی کردەوە کە ئەو قسەیە ،یان تۆمەتە تەنها حوسەین حوزنی کردویەتی ، ئەویش دیارە کەلەبەرچی وتویەتی ،بەڵام ئێرە جێی وتنی نیە !!
- هەڵە نەبم هەندێ لەمێژونوسان ئەوەیان ساغکردۆتەوە کە حوسەین حوزنی کێشەیەکی لەگەڵ بنەماڵەی مەلای خەتێ هەبووە بۆیە ئەوتۆمەتە گەورەیەی داوەتە پاڵ مەلا ی خەتێ- نوسەری پاشای گەورە لەمیانەی ناساندنی کتێبەکەیدا و لە باسی هۆکارەکانی ڕوخانی میرنشینی سۆراندا ، چەند جارێک بەبەڵگەوە جەختی کردەوە ،کە ئینگلیزەکان هۆکاری ڕووخانی میرنشینەکەی پاشای گەورە بوون ، چونکە ترسی ئەوەیان هەبوو کە ڕووسەکان دەس بەسەر ناوچەکەدا بگرن..
 
جێی سەرنجم بوو ،کە هەرلەکۆڕەکەی (ئارێز عەبدوڵا) دا نوسەرێکی دیکەی ڕواندزی قسەی لەسەر بابەتی کۆڕەکەو تۆمەتەکەی حوسەین حوزنی کرد ، وێرای جەختکردنەوەی لەسەر ئەو ڕاستیە کەئەو کەسێکی دیندار نیە ، بەڵام وەک خۆی وتی ئێمە زۆرجاریش بەناهەق هێرشمان کردۆتە سەر (سەلاحەدین ئەیوبی) ، ئەوەی (مەلای خەتێ ) ش هەروایە و هۆکارەکەی ئەو گرێ دەروونیە ( عقدە نفسیە)یە کە بەرامبەر ئاین هەمانە ،کە پێویستە ئیتر ئەو عوقدەیە تێپەڕێنین.
 
بەش بەحاڵی خۆم خۆشنود بووم بە قسەکانی ئارێز عەبدوڵاو ئەو برادەرەش ، کە پێموایە گۆڕانکارییە لەبیرو بۆچوونی بەشێک لە نوسەرو ڕۆشنبیرە پاشخان چەپەکان بەرەو ئاراستەیەکی ڕاست و ئیجابی،کە پێشترلە حەفتاکان و تاکۆتایی هەشتاکانیش و بگرە زیاتریش، لەژێر کاریگەریی باڵادەستی و هەیمەنەی ئایدۆلۆجیای مارکسیزمدا ، زۆر ستەمیان هەم لەمێژوو ، هەم لە ئاینی ئیسلام و کەسایەتیە مێژوییەکان و سومبولە ئیسلامیەکان دەکرد،تەنانەت تا ساڵانی ناوەڕاستی نەوەدەکانیش ، هەرلەو چوارچێوەیەدا تۆمەتی ئەوەیان دەدایە پاڵی (شێخ مەحمودی حەفید ) کەگوایە تەوقەی لەگەڵ ئینگلیزەکاندا نەکردوە ،بۆیە نەیانکردە دەوڵەت !! بێ ئاگا لەوەی کە شێخ مەحمود بۆ بەدەسهێنانی پشتیوانی لەپڕۆژەکەی و چەسپاندن و گەورەکردنی حوکمداریەتەکەی ، نامەی بۆ (لینین) ی سکرتێری گشتی حیزبی شیوعی و سەرۆکی یەکێتی سۆڤیەت ناردوە ، کەبڕوای بە هیچ ئاینێک نەبووە، خۆئینگلیزەکان هیچ نەبێ ئەهلی کیتاب و باوەڕدارن!!
 
 
?

هه‌واڵی گرنگ