سەرۆکی دادگای فیدڕاڵی ڕایدەگەیەنێت، لە ئێستادا رۆڵی نەتەوەیەکگرتوەکان گرنگە لە چارەسەرکردنی ئەو کێشانەی لەبەردەم هەڵبژاردنی پەرلەمانی کوردستان بونیان هەیە.
ئەمرۆ یەك شەممە 7_ی نیسان-ی 2024 جاسم محەمەد عەبود سەرۆکی دادگای فیدڕاڵی لەگەڵ جێنین پلاسخارت نێردەی سکرتێری گشتی نەتەوەیەکگرتوەکان کۆبۆوە و گفتوگۆیان لەبارەی رۆڵی نەتەوەیەکگرتوەکان لە عێراق و بڕیاری دادگای فیدڕاڵی لەبارەی جێگیرکردنی موچەی فەرمانبەران لە بانکە فیدڕاڵییەکان.
لە کۆبونەوەکەدا سەرۆکی دادگای فیدڕاڵی ئاماژەی بەوە كرد، بە گوێرەی دەستوری عێراق و بەپێی ماددەی 117 بڕیار لەسەر هەرێمی کوردستان و دەسەڵاتەکانی دراوە، ئەم دەستورە دەسەڵاتەکانی یاسادانان و جێبەجێکردن و دادوەری پابەند دەکات بە جێبەجێکردنی بڕگەکانی.
باسی لەوەش كرد، دادگای فیدڕاڵی بەشێوەی سەربەخۆ کار لەسەر دۆسییەکان ناکات، بەڵکو ئەو دۆسیانە یەکلایی دەکاتەوە کە سکاڵایان لەبارەوە بەرزدەکرێتەوە، ئەویش بە گوێرەی بڕگە و ماددەکانی دەستور، ئەوەی لە ئێستادا گرنگە رۆڵی نەتەوەیەکگرتاوەکان لە چارەسەری ئەو بەربەستانەی بەرەنگاری هەڵبژاردنی پەرلەمانی کوردستان دەبنەوە.