نیکاراگوا لە دادگای دادی نێودەوڵەتی لە لاهای، سکاڵایەکی دژی ئەڵمانیا بەتۆمەتی هاوکاریکردنی ئیسرائیل و ئاسانکاریکردن بۆ ئەنجامدانی کۆمەڵکوژی دژی فەڵەستینییەکان تۆمارکرد.
ئاژانسی فرانس پرێس بڵاویكردەوە، کۆماری نیکاراگوا داوای لە دادگاکە کردووە رێکاری بەپەلە بگرێتەبەر بۆ هاندانی بەرلین تا چیتر چەک و کەرەستەی سەربازی نەداتە ئیسرائیل.
هاوكات سباستیان فیچەر، وتەبێژی وەزارەتی دەرەوەی ئەڵمانیا تۆمەتەکان رەتدەکاتەوە.
ئاماژەی بەوەش كرد ئەڵمانیا هیچ رێککەوتن و یاسایەکی مرۆیی نێودەوڵەتی پێشێل نەکردووە و لەبەردەم دادگای دادی نێودەوڵەتی ئەوە دەخاتەڕوو.
بڕیارە ئەمڕۆ دووشەممە نیکاراگوا سکاڵاکەی لە دادگای دادی نێودەوڵەتی بخاتەڕوو، رۆژی دواتریش، ئەڵمانیا وەڵامی سکاڵاکە بداتەوە.