ئەندامێكی ئەنجوومەنی نوێنەرانی عێراق ڕایدەگەیەنێت: هیواخوازین لە داهاتوودا زیادكردنی مووچەی خاوەن پێداویستیە تایبەتیەكان كە بڕیارەكە بۆ عێراق دراوە هەرێمی كوردستانیش بگرێتەوە.
دارا سێكانیانی ئەندامی ئەنجوومەنی نوێنەرانی عێراق لەكوتلەی یەكگرتووی ئیسلامیی كوردستان بە كوردیوی ڕاگەیاند: دوێنێ لە كۆبوونەوەی ئەنجوومەنی نوێنەرانی عێراق دەنگ لەسەر پڕۆژەی هەمواری یەكەمی یاسای خاوەن پێداویستی تایبەتی ژمارە (38) ی ساڵی (2013) درا كە مووچەكەیان (170) هەزار دینار بوو، دوای خوێندنەوەی پڕۆژە یاساكە بە زۆرینەی دەنگی ئەندامانی پەرلەمان مووچەكانیان كرا بە (250) هەزار دینار.
وتیشی: هیواخوازین و گەش بینین لەسەر بنچینەی بڕیارەكەی دادگای فیدراڵی كە یەكگرتووی ئیسلامیی كوردستان داواكەی پێشكەش كردبوو، بڕیاری زیادكردنی مووچەی خاوەن پێداویستیە تایبەتیەكان و سەرجەم مووچەخۆرانی هەرێمی كوردستان هاوتای عێراق بكرێتەوەو ئێمە وەك كوتلەی یەكگرتوو كار لەسەر ئەو بابەتە دەكەین.